Haitiano doño di dos bar haya culpabel di traficacion di dos muhe

Sentencia den Corte

ORANJESTAD (AAN): Diabierna mainta, e homber Haitiano di inicial C.E. di 51 aña biba na Aruba, a presenta den Corte pa scucha decision di Hues den e caso penal cu Ministerio Publico a cuminsa contra dje.

   Tratamento di e caso tabata 10 October 2025 caminda Fiscal a haya C.E. culpabel di traficacion di muhenan pa laga e muhenan traha prostitucion. Fiscal a exigi 4 aña di prison y pa C.E. paga daño perhuicio di 10 mil Florin.

   Sentencia: Hues ayera mainta a bay hopi detaya riba e caso. El a mustra cu un muhe cu a traha prostitucion, a haci denuncia contra C.E.

   Despues di investigacion door di e instancia concerni, tres otro muhe a haci denuncia di traficacion di hende contra C.E.

   Hues a bisa cu segun abogado mr. D.Croes, boluntariamente e muhenan a bin Aruba y no tabatin obligacion pa nan traha.

   No a obliga traha prostitucion: Hues a mustra cu e acusacion contra C.E. ta cu entre 1 Juli 2024 y  24 Februari 2025, C.E. a trafica dos muhe y obliga nan pa traha. E muhe di Santo Domingo di inicial T. di 31 aña a declara na Polis, cu el a traha den prostitucion y for di un amiga Colombiana el a tende cu e por bin Aruba.

   El a yama C.E. pa bin. C.E. a manda un acuerdo pa T. y T. a firma. El a bin Aruba y a haya un camber na un bar na San Nicolas. E muhe Colombiano di inicial F. di 34 aña, a declara na Polis cu el a traha na varios pais den Caribe y hasta Aruba den prostitucion. El a bin Aruba atrobe y traha cerca C.E.

   Hues ta haya cu no tin prueba cu C.E. a forza nan y pesey ta declara C.E. liber di e acusacion di lo a forza nan traha.

   Trafica muhenan: Pa loke ta e acusacion di traficacion di hende, Hues ta haya cu C.E. a laga e muhe F. sigui traha siendo cu su tempo a pasa. Hues a mustra cu e muhe C., a bin Aruba como turista y segun ley e no por a traha. Sinembargo el a traha den bar y tabata haci e lugar limpi. A cambio di su trabao, e tabata haya estadia.

   Hues ta haya cu C.E. tabata sa cu e traficacion di hende ta ilegal y tabata gana placa riba nan cabez. Hues ta haya C.E. culpabel di traficacion di 2 muhe.

   Baha castigo: Hues a bisa cu Fiscal a exigi  4 aña di prison di cual 6 luna ta condicional pa C.E. Hues a bisa cu door cu el a declara C.E. liber di a forza e muhenan traha, e demanda di un muhe di 16 mil Florin ta keda declara no admisibel.

   Pa e traficacion di 2 muhe, Hues a condena C.E. na 10 luna di prison di cual 4 luna ta condicional. Hues tambe a condena C.E. na paga un boet di 5 mil Florin y si e no paga esaki, e lo mester bay 10 dia sera den prison. 

   Mirando e hecho cu Hues a baha e castigo, e chens ta keda cu Ministerio Publico por apela. Tempo lo mustra si e caso aki lo bay Corte Superior of no.