Guardacosta a confisca un total di casi 4.000 kilo di droga

The content originally appeared on: Diario

Den apenas tres siman — * Dos Arubiano deteni

ORANJESTAD (AAN): Segun informacionnan di Guardacosta, boto di patruya ‘Metal Shark’ di punto di sosten di Guardacosta na Aruba, den colaboracion cu unidadnan di avionnan di Guardacosta, a detene  dos boto, y asina agentenan a logra confisca un total di casi 500 kilo di contrabando. Dos Colombiano, un Venezolano, y dos Arubiano a wordo deteni den e caso aki. Esaki a tuma lugar riba diamars y diaranzon siman pasa.

E droga y e sospechosonan a wordo entrega na e Unidad contra Crimen Organisa di Cuerpo Policial di Aruba, cu ta sigui cu investigacionnan di e caso.

Diahuebs, Zr.Ms. Groningen, cu tabata navegando pa Guardacosta di Caribe Hulandes, a bolbe intercepta un transporte di droga. Esaki tabata un coordinacion cu  Centro di Operacion Maritimo (MOC), cu a conta cu cooperacion di helicopter y avion di Guardacosta. Durante e accion aki mas di 1000 kilo di contrabando a wordo keda confisca y a detene cinco Venezolano. E contrabando y e sospechosonan a wordo entrega na Cuerpo Policial di Corsou, cu mester sigui cu investigacionnan.

Cu e ultimo accion aki, Guardacosta a logra intercepta un total di seis caso di contrabando den un lapso di tres siman. E cantidad total di peso di contrabando confisca durante e seis accion aki tabata yega na casi 4000 kilo.

Lucha contra traficacion di droga ta tumando lugar den bon cooperacion cu Guardacosta su partnernan local den cadena hudicial, manera e diferente Cuerpo Policial di Corsou y Aruba, BOT K-9 di KIA, Guarda nos Costa, Duana y Servicionan di Imigracion.