Grupo local na Aruba ta sugeri algun medida nobo pa combati Omicron riba e isla

The content originally appeared on: Diario

ORANJESTAD (AAN): E grupo local Rainbow Warriors a nota cu e cantidad di hende cu ta saliendo positivo pa Covid-19 ta subiendo na forma explosivo. 

Riba Dialuna a mira rij masha largo di auto mes ta warda nan turno pa haci e PCR test.

   Diamars a divulga cu 72 persona a sali positivo pa Covid-19, y posibilidad ta grandi cu hopi di e hendenan aki tin e variante di Omicron.

   Corda cu Omicron ta tres biaha mas contagioso compara cu e variante Delta.  Esey segun un analisis nobo haci recien.

  E number di Reproduccion (conoci como R value) pa Omicron ta 3.47, segun e prome calculo pa e variante nobo aki, haci pa Profesor Alastair Grant di University of East Anglia.

   Variante Delta mientras tanto tin un R value di como 1.0 na Gran Bretaña.

   E grupo local ta recomenda pa Aruba introduci medidanan mas pronto posible pa evita cu e casonan aki ta sigui subi explosivamente.

(1) Cancela tur bishita di Cruiseship te cu 6 di Januari 2022.

(2) Bin cu Toque de Queda for di 12:00 am te cu 5:00 am.

(3) Tapaboca y stacion di handsanitizer tur caminda.

(4) Prohibi fiestanan comercial di Pasco y Aña Nobo pa turista y localnan.

(5) Aumenta medidanan pa Restaurant, Bar, Clubnan Nocturno, Gym paden, y lugarnan di Deporte.

(6) Reduci cantidad di hende na entiero y recepcion di boda.

(7) Aumenta medida na Casnan di Anciano, Hospital y tur facilidad Medico.

(8) Aumenta control di trafico riba documentonan y hendenan burachi pa reduci cu ta yena cama na Hospital cu heridos.

(9) Adapta tur apps di tracing y tracking pa Covid-19.

(10) Bin cu tur tracing temporal y personal pa trck, y bin cu facilidadnan adecua pa haci test.

   Nan ta kere cu mester elimina e aprobacion di antemano di Docter of DVG pa bo bay haci test.  Si acaso un persona kier haci test di Covid-19, si e pashent por mustra e necesidad pa esaki basa riba posible contacto cu hende contagia, e lo por bay automatico.