Gremionan ta OK pa bin cu BTW pero e mester ta cu tarifa di 10%

The content originally appeared on: Diario

Mescos cu IMF tambe a sugeri

ORANJESTAD (AAN): Comercio no ta contra BTW, pero ta contra e forma cu uta implementando esaki aworaki.

   Tur gremio a alinea y a bisa cu en general BTW no ta malo pasobra e lo bay trece hopi compliance, como cu tin hopi placa afo riba caya.  Comercio semper ta kere den “ley pa un, ley pa tur”, pues cu tur hende ta paga nan fair share.

   Sinembargo na Aruba, semper a cobra impuesto di ‘un grupito’, y pesey tin asina hopi placa riba caya!  Djis corda tambe con Gobierno a bay duna 80% di descuento na debedornan di 10 aña atrasa di belasting.

   Tur esey ta inhusto den bista di e bon pagadornan di impuesto!

   Na opinion di Frans Ponson di Comerciantenan Uni, tur e placa ey riba caya ta loke Gobierno tin di bay cobr’e.  Pesey nan ta mira cu BTW ta uno cu lo pone tur hende contribui na dje.

   Pesey mes e gremionan hunto a manda un carta pa Gobierno, y ta pidi pa por fabor bin cu un BTW, pero di un solo tarifa pero e mester ta tarifa abao.

   Ponson a mustra cu IMF tambe a sugeri esey pa mantene e tarifa abao.  Pero pa sorpresa di tur hende, di tur gremio, y di comerciantenan, ata awor ta mira cu Gobierno tin pensa di bay riba 14 porciento.

   “E 14 porciento aki, pueblo no por bay page!  Period!”  Esey ta loke Ponson di Comerciantenan Uni a indica.

   “Nos no ta contra e BTW, pero e mester keda cu e filosofia di ‘keep it simple’, pues uno facil pa pueblo controla, facil pa comercio cumpli cune, y mester ta un tarifa mas abao.”

   Ponson a indica, cu e gremio tin deseo pa e BTW di Aruba bira uno cu unico tarifa di 10% y nada mas.  Esey ta e tarifa cu IMF tambe a sugeri pa Aruba.

   “Nos ta pensa cu Aruba mester haya un tarifa di 10%, pero e asunto di multi-tarifa di 6% y di 14% cu Gobierno ta papiando di dje, ta manera cu ta manda un mensahe pa pueblo cu ta spaghetti so nan por bay come y haya 6%, pasobra tur otro cos cu bo busca, of bo kier bay mira pelicula, etc., eseynan ta 14% nan ta bay cobra.”

   No ta husto pa pone un BTW djis pa pueblo come barata so!

   Ademas si Gobierno bin cu dos tarifa di 6% y di 14%, bo no tin di lubida cu pa e comerciante ta bay hinca tur gasto den su prijs.  E tin di busca un hende extra den servicio, pasobra cada recibo di 6% y di 14%, e tin di bay skirbi nan uno-pa-uno, y esey ta mas gasto.

   E idea di multi-tarifa lo ta uno mas complica!  Mas complica pa tur comerciante pone mas hende den administracion.  Mas complica cu ta haci prijsnan subi aun mas.  Na fin di dia, toch e producto lo bira mas caro.

   Mihor bay na un solo tarifa di 10% y mantene abao.