Gregory Fung-A-Fat ta contento cu cosnan a cuminsa cana den e mundo di seguridad di cuminda

The content originally appeared on: Diario

ORANJESTAD (AAN)—Den entrevista cu DIARIO, señor Gregory Fung-A-Fat, di United Farmers Aruba,

a bisa cu e ta contento di mira cu cosnan a cuminza cana, pa loke ta e mundo di seguridad di cuminda.

Fung-A-Fat a comenta cu desde dos aña pasa cu nan di United Farmers a pone presion, el a duna su palabra cu e lo haci todo por todo, y el a logra, conhuntamente cu Qredits a haci un bon trabao.

Fun A Fat a expresa cu tin otro cosnan den “pile line” cu Minister Wever a bisa cu esey ta loke e por haci.

“United Farmers conhuntamente cu Minister Wever, definitivamente nos por wak cu tin progreso. Tin hopi cos cu nos tin cu bay haci, y esaki ta e prome stap. Nos tur sa cu desde temporada di Covid, nos ta añanan atrasa. No ta algo cu nos a cuminza ayera” Gregory Fung-A-Fat a señala.

Food security ta un palabra cu tin hopi dificultad pa bisa, kico ta encera, pasobra tin cu wak na Aruba ken ta esun cu ta produci cuminda pa awo, Gregory Fun A Fat a expresa.

El a expresa cu den seguridad di cuminda, tin e parti di turismo y tin e parti local. “Unda bo enfoke ta bay ta?” Fung-A-Fat ta puntra.

“Mi ta kere cu nos ta casi igual di cantidad di turista y local, actualmente riba e Isla y nos no tin e lugar pa haci pa tur dos. Nos tin cu bay sinta y palabra ‘ok, kico nos ta focus awo pa nos bay dilanti’. Riba e tereno di agricultura, e ultimo lunanan nos a wak un mehoracion riba e parti di Gobierno, pero tambe internacionalmente a stress cu nos tin cu cuminza move. Nos tin hopi hende interesa ainda, pero nos tin nos retonan. Y e reto di mas grandi awo ta cu nos tin comunicacion cu DIP pero no ta canando di manera cu mañan nos tin contesta”, Fung-A-Fat a comenta.