Gobierno tin 325 coordinador riba payroll chicando 32 miyon Florin

admin

Evelyn Wever-Croes mustrando riba otro presupuesto irealistico…

Gobierno tin 325 coordinador riba payroll chicando 32 miyon Florin1
Gobierno tin 325 coordinador riba payroll chicando 32 miyon Florin2

ORANJESTAD (AAN): Parlamentarionan di MEP den e dianan aki ta studiando e presupuesto pa 2017, cu a worde entrega na Parlamento luna pasa. Por nota cu no tin mucho cambio compara cu otro añanan.

   ENTRADA VS GASTO:

   Entradanan di gobierno ta worde premira cu lo aumenta den 2017 basa riba un crecemento economico di 6.1% cual tanto Raad van Advies como CAFT ta considera demasiado halto. Tambe pasobra lo saca 26.6 miyon Florin di dividend di companianan estatal, compara cu 19 miyon aña pasa!

E gastonan total di gobierno a aumenta den 2017 te na 1,388,880.100, cual ta 52 miyon Florin mas cu aña pasa, y un biaha mas ta mas halto cu nan propio plafond di 1,350,000,000 cu gabinete Mike Eman a pone como meta. E malgastamento di placa den coordinador, bayhamento, fiestamento, propaganda y consehero a continua. Asina tambe cantidad di gastonan cu ta worde cuestiona nan necesidad den e tempo di crisis aki.

   DEFICIT 0.5%?

   E deficit mester ta 0.5% of menos, segun e ley di CAFT, y segun gobierno nan a logre, pero basa riba un crecemento economico mucho halto; recientemente Banco Central a downgrade e crecemento economico di e aña aki, y Raad van Advies y CAFT a avisa cu e  6.1% cu gobierno a aplica pa 2017 tambe mester worde baha. Consequentemente Raad van Advies y CAFT ta yega na un deficit mucho mas halto, 2%. CAFT a visa tambe cu den e nota di cambio mester bin mas medida ‘cover’ e 1.5% aki.

   COORDINADOR:

   E cantidad di coordinadornan riba payrol official di e ministernan ta 325! Mike Eman so so tin 113 pa aña 2017, siendo cu Nel Oduber tabata tin 17 na 2009. Te dia di awe ningun hende no sa UNDA e 113 coordinadornan di Mike Eman ta, pasobra den Cococlishi no tin tanto lugar pa nan tur, y tampoco ningun hende no sa KICO nan ta haci. Den e tabel adhunto bo ta mira un comparasion pa cada ministerio. e gastonan di coordinadornan ta 32 miyon Florin pa 2017!

    GASTONAN DI BIAHAMENTO, HUUR, ABOGADO:

    Na gasto di biahamento nan ta gasta 1.7 miyon Florin; na propaganda 3.3 miyon Florin. e gastonan di propaganda a subi pa e aña di eleccion cu 11%! Nan gastonan di huur pa 2017 tin 23 miyon Florin den presupuesto, siendo cu aña pasa e tabata 21 miyon Florin, un aumento di 6% principalmente debi cu mester cuminsa paga huur na MFA. No lubida cu e average di gasto di huur tempo di MEP tabata 17 miyon; kiermen nan a gana eleccion bisando cu nan ta bay elimina huur, pero nan a bay huur mas ainda. Na gastonan di abogado y conseheronan (coordinadornan cu no ta riba payrol pero tin nan propio NV), nan ta bay gasta 14 miyon Florin na 2017.

Next Post

Studiantenan a cuminza harta di situacion na Venezuela y a cuminza subi caya

ORANJESTAD (AAN): Ora cu Consejo Nacional Electoral di Venezuela a dicidi pa suspende e buscamento di firma di e 20% pa por activa e referendum di Revocatorio, e Movimento Estudiantil Venezolano di Universidad UCV, a cuminza cu un mobilizacion di forma di protestanan dilanti e medidanan aki.  E actividad ta […]