Gobierno saliente mester entrega rapport di su trabou

The content originally appeared on: Diario

Demasiado atencion ta wordo dedica na promesanan pa futuro — *Hunto cu expertonan mester traha relato di loke a haci cu placa —*Prome cu eleccion mester enfrenta Pueblo cu realidad presente

ORANJESTAD(AAN)—Na diferente momento den historia di pais Aruba, Pueblo a bay urna electoral cu un bista completamente robez di e situacion cu e Gobierno saliente a laga atras.

Esaki ta e realidad cu a wordo presenta cu prueba na DIARIO y den cual a wordo mustra cu tanto na 2013 como na 2017, Aruba a vota sin e informacion concreto di loke a keda atras.

Segun informantenan clave esaki tabata e problema grandi pa Aruba cu na 2018 a wordo presenta cu un pakete di medida, cu for di 2015 ya a wordo signala como e aña den cual Aruba lo a haya su mes den problemanan sumamente serio, si no bini cambio den e maneho financiero di Aruba cu a empeora.

“E forma cu Pueblo di Aruba mester acudi na urno electoral no ta honra democracia, cu ta exigi pa Pueblo tin tur informacion cu ta haci cu Pueblo por vota na interes di e pais,” informantenan a indica.

A trece dilanti cu durante eleccion por mira mas bien cu acento ta wordo poni riba programanan pa gobernacion cu ta yena na demasiado occasion cu fantasia na cual hamas e partido por tene su mes.

Segun expertonan no por ta cu Pueblo mester bay eleccion cu suficiente capacidad cu ta haci cu e por huzga e gobierno cu ta baha y ta busca voto pa e keda na mando.

Na 2013 Aruba a bay eleccion pa un gobierno cu segun Pueblo a haci un tremendo trabou riba tereno financiero pasobra Pueblo tabata mira e forma cu a baha BBO cu mitar.

Pero na 2013 ya Gobierno tabata prepara medidanan cu e mester a tuma y na 2014 ta mira e medidanan aki presente ora bom a rementa na Aruba hasta sin Hulanda.

Na 2017 Aruba no tabata prepara pa e cantidad di placa cu e mester a paga realmente na debe y tabata kere ainda cu Citgo lo a haci un milager. Esaki ta haci cu na 2018 e sorpresanan amargo tabata tin mas peso pa Aruba.

E unico forma segun expertonan pa pone fin na e realidad aki ta, pa exigi gobiernonan cu mester baha na momento cu nan termino a caba of pasobra cu a surgi problema den coalicion, pa entrega na Pueblo cifra corecto di e estado financiero den cual nan ta bay laga Pueblo.

Prome cu eleccion instancianan manera Algemene Rekenkamer Aruba mester prepara cifranan den cual ta duna Pueblo un resumen.

Segun Ley pa por traha un presupuesto, e cifranan pa cualkier aña, un Gobierno mester di e cifranan corecto di e ana anterior, cu mester a wordo acorda dor di Parlamento.

Pa e ultimo lunnan di gobernacion por presenta cifranan tentativo di instancianan oficial pa asina Pueblo no mester vota a base di promesa pa futuro, pero trabou cu e gobierno a haci, e placa cu el a gasta di e pais.

E forma cu Pueblo ta vota a base di promesa y no a base di loke gobernacion a haci y den cual cifranan no ta presente pa ningun bisa con nan lo cambia e cifranan aki na interes di e pais, ta haci cu eleccion no ta entrega Pueblo e oportunidad pa huzga un gobierno saliente riba hechos loke ta haci cu Pueblo ta vota solamente basa riba promesa, loke ta contra democracia.