Gobierno lo introduci un pakete fuerte di medida contra empleo di personanan ilegal na Aruba

The content originally appeared on: Diario

Minister Rocco Tjon: *Estadia ilegal tambe lo bira castigable!

ORANJESTAD (AAN) – Minister di Husticia y Asunto Social, señor Rocco Tjon, a acentua den conferencia di prensa di Diahuebs, cu locual e ta bay introduci dentro di poco ta hopi importante pa tur hende sa.

“Y mi kier manda e mensahe aki mesora, ta cu nos ta bay enfoca mas tambe riba e ‘bestuurlijke aanpak’ (con pa dirigi e maneho), y esaki ta encera cu esnan cu ta emplea personanan sin e permisonan necesario lo bay haya boetnan halto”, Tjon a remarca.

E mandatario a duna di conoce cu ya caba luna pasa, diferente compania a haya multanan cu ta yega te 75 mil florin, y ya caba el a indica na tur e departamentonan, cu e luna aki nan ta bay reuni encuanto e maneho aki pasobra e lo wordo intensifica. El a subraya cu den futuro e boetnan lo bay ta hopi mas halto, y tur hende mester sa cu no por emplea personanan indocumenta.

“Aworaki semper ta asina cu ta duna un carta di advertencia prome, pero manera e ta bay wordo adapta, di biaha ta bay duna boet y nan ta bay bira mas halto, lo actua tambe mas fuerte contra hendenan local cu ta facilita personanan pa drenta Aruba y ta duna nan entrada ilegal tambe, ora cu e personanan ta wordo gara, tur e gastonan Pais Aruba no ta bay wanta nan mas, pero ta bay wordo poni riba e personanan y asina wanta nan tambe responsable pa esaki. Y por ultimo, e parti legislativo nos ta analizando hunto cu huristanan, pa adapta e ley na unda nos ta bay haci estadia ilegal na Aruba, tambe castigable pa ley, den futuro. Mi ta kere cu a base di e pakete di medidanan aki lo  nos por percura pa brinda un miho defensa, pa e fenomeno cu nos ta wordo confronta cune, awendia”, Minister di Husticia y Asunto Social Rocco Tjon a conclui.