Gobierno kier pusha gremionan pa introduci regla di 2 aña di prueba pa tur trahador

The content originally appeared on: Diario

Nan kier elimina “dos luna di proeftijd”…

ORANJESTAD (AAN): Siman pasa tabatin Congreso y e forma con esaki a wordo prepara, y e forma cu a hisa benta documento riba mesa di e Sindicatonan, y contenido di esaki cu ta algo hopi schuin mes, unda e.o. e plan tey pa cambia regla na Aruba unda tur trahador lo bay labora awor cu un ‘proeftijd’ di 2 aña envez di e acostumbrado 2 luna… a pone e Sindicatonan dicidi cu esey ta basta, y no ta acepta nada.

   Tur cos a cuminza riba 9 di Augustus 2022 ora Sindicatonan a ricibi email bao capa di “dialogo tripartite social laboral”, pa bisa cu e tres ultimo dianan di e siman di 7 di September 2022 lo tin reunion.  Tur hende corda cu na 2019 tabatin congreso na La Cabana cu tripartite bon organiza, cu reglamento completo pa algo oficial.  Gremionan Sindical cu Comercial y Gobierno a vota pa e constelacion ey.

   Diripiente dia 18 di Augustus 2022, e Sindicatonan a haya informe telefonicamente cu loke lo socede na September lo bay ta un ‘Congreso Informativo’ pa haya informacion.  Despues dia 30 di Augustus e Sindicatonan a tuma nota oficial cu a haya invitacion cu e horario y e lugar di Congreso.

   Figurabo cu te Diabierna dia 2 di September 2022 atardi a haya documentonan di mas di 200 pagina pa lesa pa ta prepara dia 7 di September.  Pues solamente 2 dia di trabao pa nan por lesa nan prome cu comienzo di e ‘Congreso’.

  Ora cu a bay mira e Agenda, a tuma nota cu riba 3er dia nan kier bin cu rapport final, unda cu a compronde cu nan kier pa gremionan Comercial, gremio Sindical y Gobierno bin cu plan pa ehecuta.

   Ora di lesa e documentonan, e tin di haber cu posicion huridico di trahador, pasobra e ta referi na parti E1 y E4 di Landspakket cu ta papia di condicion laboral y parti social.

   Sindicatonan tin di representa nan miembronan na un forma digno, y si yega 2 dia prome pa duna 200 pagina pa lesa y despues bisa cu tin di bay cu acuerdo cune, Sindicatonan a splica Gobierno cu esey no ta e forma responsable.

   Es mas, Gobierno mes ta viola e reglamento cu a wordo introduci na 2019 pa Congreso Social Laboral.  Nan a core mustra Gobierno con na 2019 nan a bin cu mesun reglamento, unda ta poni na Articulo 9 cu ora yama un Congreso y kier manda e materialnan, tin di wordo manda 10 dia di trabao prome.  Si bo mande 2 dia prome, ya bo no ta cumpliendo cu bo mesun reglamento.

   Tambe Articulo 10 ta mustra cu tin 2 forma con nan por yama reunion pa un Congreso.  Pero si bo tuma nota con e Congreso aki a wordo yama y ser atendi, e no a cuadra cu e reglamento.  Ta parce cu un hende cu a organiza esaki no tabata sa unda su cara ta para.

   E mainta ey di Congreso, e Sindicatonan a vocifera tur esaki, y a apunta tur esaki tambe por escrito, y esey ta importante.

   Dos aña di proeftijd: Segun Sindicatonan, den e documentonan tin algun punto cu ta positivo pa e trahadornan, tin cierto aspecto cu tambe ta negativo pa e trahador.

   Manera aworaki den sector priva, ora cu un trahador wordo tuma den empleo, e ta labora riba 2 luna di proeftijd.  Den e documentonan aki tin proposicion pa haci e dos luna ey bira “2 aña di proeftijd”.

   Den serio kier bin cu 2 aña di prueba?  Aki Sindicatonan ta bisa cu esaki ta algo cu ta perhudica e trahador.  Pasobra un trahador kier siguranza riba su posicion huridico, e kier cu e por bay banco pa cumpra auto of cera un hipoteca.  Cu e cambio aki, e chens ta grandi cu despues di 2 aña, ata e compania ta bis’e cu nan no kier e trahador mas, nan ta prefera di busca un otro trahador pa labora pa 2 aña.

   Aunke e cambio di ley ey ta pa sector priva, toch tin di tene cuenta cu pa Sector Publico tambe lo kier bay bin cu cambionan segun e Landspakket, como cu e tambe tin reformanan den sector publico.

   E diesun Sindicatonan hunto y organizacion OPPA a uni den solidaridad y para y bisa cu nan o ta acepta con e cosnan aki ta canando.

   Tambe dia 8 di September, nan a manda un carta pa Secretario di Estado na Hulanda, pa e tambe tuma nota di con Gobierno ta bin cu e maneho aki, cu no ta un forma responsable.  Nan kier bin 5 pa 12’or y bulldoze bo cu papel, y tin te 12’or pa bisa “si of no”.  Mañan ora cos bay malo, ta e mesun Gobierno lo bay sinta na conferencia di prensa pa bisa cu ta Sindicatonan mes a bay di acuerdo.