Gobierno kier pa 15% di tur auto na Aruba ta electrico pa 2030

The content originally appeared on: Diario

Ministro Glenbert Croes a mustra — ORANJESTAD (AAN): E programa di gobernacion a wordo firma recien, y durante un conferencia di prensa di Conseho di Ministronan, a duna informacion di e plannan cu nan tin pa haci.

   Ministro Glenbert Croes, encarga cu Ministerio di Labor, Energia y Integracion, a bisa cu e lo wordo guia pa tres di e principionan fundamental, cu ta (1) Sustainable Development Goals, (2) International Labour Organization, y (3) Derechonan Humano.

    ENERGIA: Ministro Croes a splica cu e maneho riba energia lo ta dedica riba durabilidad, sostenibilidad, accesibilidad, y calidad.  E meta ta pa bin cu energia pagable, sostenible, duradero y limpi pa compania y lugarnan na Aruba.

   Tambe kier yega na un reduccion di emision di Carbon Dioxide (CO2) cu 45% pa aña 2030 cu un medio ambiente sostenible pa cumpli cu e meta di Nacionnan Uni pa combati e efectonan di calentamento global cu 1,5º Celsius.  Tambe logra cumpli cu e Tratado di Paris pa aña 2050 unda Aruba ta contribui na un Medio Ambiente sostenible ‘carbon-neutral’.

   Ministro Glenbert Croes a bisa cu lo mehora e eficiencia di e companianan di utilidad cu proyectonan di e.o. RECIP-IV cu lo logra reduci uso di combustible Heavy Fuel Oil (HFO) pa produccion di electricidad for di 3.679 bari pa dia te na como 2.800 bari pa dia.  Despues kier logra un transicion di como 40% pa energia renobable y reduci e uso di combustible ainda mas te na 2.000 bari pa dia pa 2030.

   Tambe el a mustra riba e plan pa aumenta e uso di Energia Solar y di Biento cu a cuminza cu e plan pa ta 20% na 2020, cu plan pa e bira 35% pa 2024, cu e minimo di 50% pa aña 2030.

   Ministro Glenbert Croes ta bay pusha pa mas uso di vehiculo electrico na Aruba.  E kier pa como 15% di e autonan ta electrico riba e isla pa 2030.

   E kier tambe pa aumenta e eficiencia di energia den cas y companianan cu 15% na 2030.  Tambe reduci e independencia y consumo di petroleo crudo den un transicion pa energia alternativa solar y biento, rumbo pa introduccion di energia hidrogeno.  E maneho nacional riba tereno energetico tin como meta diversifica fuentenan di energia y tambe economia.

   Na e momentonan aki Aruba no ta dispone di gas natural, y pa por importa e LNG aki lo mester inverti den infrastructura y distribucion di gas, cu mester ta cla prome cu 2024.  E deliberacionnan entre WEB Aruba NV y RdA y tercer compania ta basta avanza y lo tin di yega na un acuerdo prome cu fin di 2021.

   Introduccion di gas LNG lo trece hopi beneficio pa e isla, pa produccion di energia, pa refineria, pa tereno industrial, y hasta transporte di auto y pa casnan.  E proyecto di instalacion di gas LNG lo por pone Aruba bira un hub pa almacena e producto aki den Caribe.

   Pa e refineria, Gobierno y RdA a cuminza aña pasa caba cu e proceso pa busca un inversionista y operador di e instalacionnan na San Nicolas.  E esfuerszonan lo sigui den cuadro aki pa e tereno y terminal.  Gobierno tin plan pa reactiva e waf di San Nicolas tambe.