Gobierno di Reino derechista enfrente eleccion Maduro comunista!

The content originally appeared on: Diario

Mas cu temblor den awanan teritorial Venezolano ta alerta Aruba

*Maduro ta crea pa Ministronan di Reino tarea special enfrente Aruba

*Exploracion rikeza den subsuelo Aruba y e bofta di Maduro pa Europa 

ORANJESTAD (AAN) — Dia 2 di Juli 2024, segun planificacion, Reino Hulandes lo conoce un constelacion nobo di Conseho di Ministro di Reino cu lo bira e ala democratico di Gobierno di Reino.

Segun e principio di Monarquia Constitucional, Rey Willem Alexander ta duna e contenido di monarquia na e Gobierno di Reino.

Na e momento cu e Conseho nobo di Ministro di Hulanda asumi poder, un maneho cu ta cumpli na prome lugar cu e concepto di un Gobierno Derechista manera dor di Pueblo Hulandes, lo reemplaza e Gobierno liberal di Mark Rutte, cu tabata posiciona su mes central den idiologia politico.

Pa Aruba, despues di hopi tempo ta bira realidad, cu e mayoria den Gobierno di Reino lo ta representante di e partido PVV, ganador sin duda di e eleccion na Hulanda pero tambe cu sosten continuamente creciente di e Pueblo Hulandes.

E resultadonan ta mucho mas importante cu te loke awor ta wordo presenta na e Pueblo di Aruba, pa e simpel hecho, cu manera DIARIO na diferente ocasion a trece dilanti, Statuut a entrega na Reino tareanan y debernan sumamente importante, cu ta regla e identidad y integridad nacional di Aruba na nivel mundial.

Aruba como teritorio Hulandes, na e momentonan aki mester confronta desaroyonan sumamente importante riba tereno di politica internacional y sigur regional, pa cual no solamente Gobierno mester ta bon prepara na nivel local, interno, pero pa cual Reino mester ta bon prepara riba tereno di Defensa, Integridad Nacional, cooperacion internacional y tur loke ta mishi cu e relacionnan entre Aruba y uno di e centro di peligernan mas grandi den e region Caribense na e momentonan aki, cu ta Venezuela.

Aunke na Aruba ta mitiga y tin tendencia pa no mira e peliger di Nicolas Maduro manera mester ta, Guyana ta keda e alerta grandi pa e region, cu ta ricibi de bez en cuando tambe shock di naturaleza.

Durante ultimo dianan, Aruba a bolbe bati alarma pa temblornan, cu no ta nada straño na Venezuela, cu anualmente ta registra casi Mil temblor manera cifranan ta indica.

Por lo menos dos bez pa siman, ta registra un temblor na Venezuela, cu un laman cu ta produci mas cu temblor den su subsuelo pero tambe peligernan politico inmenso.

Sinembargo, nan ta exigi atencion como peligro natural pa Aruba cu ta wordo confronta cu un situacion geo politico serio cu Nicolas Maduro como nucleo.

Aruba mas cu e otro islanan Hulandes, mester ta prudente debi na e posicion maritimo di Aruba y e awateritorial di Venezuela.

Reino Hulandes ta encarga cu e relacionnan entre Venezuela y Aruba y uno di e puntonan mas importante pa DIARIO den e declaracionnan di gobernantenan nobo Hulandes tabata, con nan ta posiciona nan mes na e momento cu Venezuela mester acudi na urna electoral pa vota pa un Presidente nobo.

Cu no por papia di eleccion liber dia 28 di Juli na Venezuela, ta bini dilanti den diferente desaroyonan pero sigur pa Reino ta wordo acentua dor di e hecho cu Nicolas Maduro no ta permiti presencia di Union Europeo pa vigila e eleccionnan, manera a wordo confirma dor di Nicolas Maduro.

Esaki tin un impacto directo pa Hulanda como parti di Union Europeo na momento cu Hulanda tambe a dicidi pues pa un maneho derechista, cu ta completamente contra maneho socialista y comunista, cu ta e base di gobernacionnan Chavista cu Hugo Chavez y Nicolas Maduro, a impone riba Pueblo Venezolano.

Mientras e fecha di eleccion na Venezuela ta acerca, informacionnan den fin di siman a indica con Nicolas Maduro ta sigui detene miembronan di partidonan cu ta opone su Gobierno y ta estrecha lazonan cu Gobiernonan comunista y sigur cu Rusia den un situacion mundial di tension politico creciente.

Pa DIARIO tabata sumamente importante pa conoce e pasonan cu Hulanda lo tuma enfrente e situacion serio dilanti costa di Aruba.

Aunke den su prome presentacionnan oficial e Ministro Secretario di Estado Hulandes nobo, cu lo reemplasa Alexandra van Huffelen no a bisa mucho, si por topa cu su expresionnan cu ta mustra den direccion di e problemanan importante cu ta sconde na Venezuela y por afecta Aruba.

E exploracion di gas den subsuelo di Aruba, sigur tin tur atencion di Nicolas Maduro segun informantenan di DIARIO y no solamente na e Ministro Hulandes y Secretario di Estado pa Relacionnan den Reino.

E Gobierno di Reino na un forma total mester ta alerta pa loke pasa cu integridad di Aruba y e Ministro di Relacionnan Exterior nobo mester expresa su mes mescos cu entre otro e Ministro di Defensa Hulandes.

Pa loke ta trata defensa Hulandes di cual Aruba ta depende, mester tene cuenta cu e hecho cu defensa di Reino Hulandes, tin atencion total den e plannan pa gobernacion.

Juli 2024 ta bira crucial pa Aruba riba cantidad di tereno sumamente importante y DIARIO ta duna maximo contenido na su tarea informativo.

Reino Hulandes na e momentonan aki ta den man di un partido Derechista, opositor di partidonan Izquierdista manera di Venezuela cu un sosten total y creciente di Pueblo Hulandes!