Gobierno di Bonaire a cumpra 2 Satellite Phone pa keda comunica den caso di calamidad

The content originally appeared on: Diario

KRALENDIJK: Si acaso un desastre socede, sea temblor of horcan pisa, cu laga tur sistema di telecomunicacion plat, incluyendo comunicacion cu fiber-optic, e ora ta dos opcion so tin pa manda señal pa exterior.

   Sea ta haci uso di hendenan cu ta den Radio Amateur cu antenna grandi riba nan cas, cu por comunica internacionalmente.  Of ta haci uso di un Satellite Phone, cu tin costo halto pa cada minuut di yamada, y cu bo ta usa un aparato special pa comunica cune.

   Esey ta exactamente loke Gobierno di Bonaire a caba di haci, specialmente pa Team di Desastre di e isla.  Nan a caba di haya dos telefon di e marca Iridium, modelo Extreme, cu ta comunica cu otro via di satelite.  Cu e Iridium Satellite Phone, nan por haci yamada internacional si acaso e red di telefon local cay afo, y si acaso e red internacional tambe wordo interumpi.

   Quinton Stroop di e compania Telbo a haci entrega di e dos Iridium Extreme Kits na Gezaghebber Edison Rijna.

   E compra di e telefonnan special pa comunica via satelite tabata un di e prioridadnan di e Team di Desastre.  Di e forma aki, Bonaire lo keda cu link habri pa exterior, si acaso tur otro cos faya.  Comunicacion directo cu Hulanda y otro paisnan lo pasa via e Iridium Satellite Phone aki den caso di calamidad.