Gobierno di Aruba a organiza un Siman di Integridad

The content originally appeared on: Diario

Awe ta observa Dia Mundial di Anti-corupcion:

ORANJESTAD (AAN) – Awe, Diasabra 9 di December, ta wordo celebra dia di Anti-corupcion, decreta pa Nacionnan Uni. Den e contexto aki gobierno di Aruba tambe a organiza un Siman di Integridad.

Den entrevista cu Minister Ursell Arends, el a bisa cu esaki ta e di dos aña consecutivo cu Gobierno di Aruba ta sostene un “Integrity Week”. Na 2022, e tema tabata “Honra bo compromiso cu Integridad” y na 2023, a bin cu un tema nobo cu ta “Sigui bo compas moral”.

            Minister Arends a comenta cu durante e Siman di Integridad tabata tin diferente orado, tanto local como internacional, cu a elabora riba diferente tema, entre otro, e tema di Integridad mes, y tabata tin un dia na Universidad di Aruba, unda a presenta na Media tocante con media y integridad tin cu bay man cu man cu otro.

            Durante e siman tabata tin presentacion na e departamentonan publico pa nan sa kico “BIA” (Bureau Integriteit Aruba) ta haciendo pa e tema di integridad na Aruba, y tambe a elabora kico ta bay bin pa 2024 y e añanan venidero, pa loke ta trata e tema di integridad den sector publico y sector priva tambe, pa mustra ehempelnan con companianan ta bezig ta aplica caba e tema di integridad den nan dia diario como compania, pero tambe ehempelnan cu otronan por siña for di nan tambe, y asina aki aplica esaki cerca nan tambe.

            “Mi mester bisa cu mi ta hopi satisfecho con e desaroyo ta bay pa cu integridad; den ultimo temponan nos a dal pasonan grandi pa gobierno di Aruba, pa loke ta trata e tema aki. Nos a introduci un codigo di conducta pa ministernan den Conseho di Minister. Nos a lanza tambe un website cu yama: publico.aw, unda ta haci tur cos transparente pa e ministerio di integridad, y tur mi ministerionan, pa asina aki minimaliza e necesidad cu un ciudadano mester recuri na un berzoek pa haya informacion”, e mandatario a menciona.

            E mandatario a expresa cu e ta hopi contento cu e siman di integridad y e ta spera cu manera aña habri lo bay tin mas desaroyo pa por sigui inculca integridad den nos comunidad.