Gobierno a bay di acuerdo cu 4 di e 5 ultimo exigencianan di unit managers di EPI

admin

Minister mustrando cu a ofrece compensacion adicional…

Gobierno a bay di acuerdo cu 4 di e 5 ultimo exigencianan di unit managers di EPIORANJESTAD (AAN): A tuma nota den medionan di comunicacion y medionan social cu tin hopi confusion pa cu e motibonan di e welga di e unit managers di EPI, e exigencianan cu tin di nan banda y e status di e deliberacionnan.

For di comunicadonan di sindicato SIMAR por ripara cu nan mes ta contradeci nan mes pa loke ta nan causa y e historia di e proceso aki.

   Tur esaki ta trece hopi confusion bou di e studiantenan, docentenan, mayornan y comunidad en general cu no ta compronde e rason nan completamente pakico ainda e unit managers ta den welga. Gobierno ta haye sumamente iresponsabel di e unit managers y di sindicato SIMAR cu ta pone studiantenan y docentenan memey di full e asunto aki, dunando e docentenan y e hobennan un “valse start” pa cu schooljaar 2016-2017.

   Siman pasa SIMAR y unit managers a presenta via di nan abogado un carta cu 5 exigencia concreto na gobierno. Gobierno a bay di acuerdo cu 4 di e 5 exigencianan aki e mesun dia, cu ta inclui 1) oranan adicional pa docentenan pa sostene e unit managers den nan tareanan, 2) lo facilita nan den 2 siman cu nan functiebeschrijving actualisa, 3) den un periodo di 3 luna lo duna claridad riba e proceso di functiehuis y implicacionnan specifico pa nan posicion como parti di MBO na Aruba, 4) gobierno lo facilita cu un proceso di mediation externo pa guia directie y unit managers pa mehora e communicacion y colaboracion.

   Adicional na tur esaki gobierno a ofrece e unit managers un compensacion (gratificatie) pa e periodo cu ta trahando riba e structura di e school. Gobierno a presenta un solucion factibel na SIMAR y Unit Managers otorgando 32 taakuren (un volledige betrekking) adicional pa cada unit pa por worde aloca na docentenan cu por haci cierto trabaonan den e unidadnan cu tin 2 Managers te ora bin claridad riba e structura di e school, incluyendo kico ta e cantidad di unit managers necesario a base di entre otro cuanto alumno y opleidingen cada unit tin.

   Esaki nan ta e puntonan cu mester worde clarifica prome cu bay over na nombra un otro Unit Manager. Tur esaki lo keda cla dentro di 4 luna, pues no ta pa un tempo indefini. Lamentablemente SIMAR y unit managers no a acepta esaki y ta keda para ariba nan punto cu vacatura pa e di 3 manager mester sali di inmediato sin cu e proceso a keda finalisa. E punto di e vacatura pa e di 3 unit manager ta e unico punto pendiente y esaki a resulta di ta e “dealbreaker” pa e unit managers y SIMAR.

   A purba na splica na mas cu un ocasion cu e proceso cu gobierno a scoge pe ta hustamente pa yega na un solucion structural y duradero pa loke ta e structura di EPI, y no pa bolbe yena buraco mientras tur hende ta consciente cu status quo no lo conduci na un EPI mas efectivo. Ta di lamenta cu e unit managers a perde e interes general for di bista y nan posicion ta perhudicando e docentenan, studiantenan y e organizacion den su totalidad. Manera palabra e “functiebeschrijvingen” nobo di tanto opleidingsmanager como begeleidingsmanager a keda formalisa y inclui den e functieboek pa cu e Proyecto di restructuracion salarial. E punto cu tin pendiente ta e formatiebeleid cu lo defini e cantidad di managers na cada unit.

    Awor lo hiba SIMAR y Unit Managers corte por medio di un kort geding pa corte por instrui nan pa resumi nan trabao na bienestar di studiantenan y docentenan manera debe ser.

   Gobierno ta asumi su responsabilidad door di facilita e unit managers lo maximo posibel y pa entama un proceso cu lo trece cambio di berdad pa cu e funcionamento di e school.

Next Post

Estudiantenan di Hospitalidad y Turismo a entrega carta cu puntonan cu Directie mester atende!

Na Colegio EPI durante accion di diabierna: ORANJESTAD (AAN) – Manera ta conoci Colegio Enseñanza Profesional Intermedio (EPI) no a cuminza funciona di manera normal e aña escolar aki 2016-2017, y e management team ta welgando for di inicio di apertura di scol. Specialmente e Unidad di Hospitalidad y Turismo […]