Gloria Feliciana y Erika Moran lo duna tayernan di trabao hopi interesante riba Dia di Rey

The content originally appeared on: Diario

Na convento di Imeldahof dia 27 di April:

ORANJESTAD (AAN) – Pueblo di Aruba ta invita pa celebra Aña di Rey na Convento di Imeldahof na Noord, di 10 or di mainta te 2 or di atardi. E ta un evento cu hopi actividad tradicional, recreativo y educativo pa grandi y chikito, y tin cuminda y bebida pa pasa un dushi dia den ambiente familiar.

Pa recauda fondo, Fundacion Kapel Bethania (FKB) tin carchi na benta pa un prijs hopi abao, cu cual por participa na entre otro, den weganan popular, hisamento di flie y quiz educativo. Cu e carchi di actividad por gana premionan atractivo. FKB lo ofrece diferente sopi y special pa Aña di Rey un “erwtensoep”. Grupo Scout San Dominico tambe lo tey pa bende dushi snacks crioyo, cupcakes y mas pa recauda fondo pa e organizacion.

Dos artista local lo ofrece tayer creativo relaciona cu e exposicion “Caribbean Ties”. Den conferencia di prensa di Museo Arkeologico Aruba, a elabora riba e tema aki. Erika Moran tambe a hiba palabra y a bisa cu dia 27 di April aki, cu ta Dia di Rey, lo tuma lugar dos tayer di trabao. Un ta wordo duna pa Gloria Feliciana cu ta un tayer riba joyeria y sea glass, y Erica lo duna un tayer di pintamento.

“E tecnica di pintamento lo ta bastante facil, cu ta consta di color full riba canvas. E ta un tayer di trabao hopi interesante. E idea ta pa tin un dia hopi creativo pero tambe cultural y artistico na un manera diferente pa Dia di Rey, ademas di comparti cu cuminda crioyo, acto cultural, presentacion di museonan tambe, y haya conocemento riba arte, por practica tambe na cas, despues”, Moran a splica.

El a splica tambe cu Gloria Feliciana lo traha e tecnica di sea glass (di lama), durante dos tayer di trabao. E tayernan di trabao aki lo tuma lugar di 10 or di mainta pa 12 or di merdia y Erika Moran lo duna su tayer pa 12’or di merdia.

Moran a haci un invitacion na pueblo di Aruba pa tin disfruta di e dia ameno aki y participa den e tayernan di trabao, y haya un entretenimento diferente. E tayernan ta pa tur edad, pues di mucha pa adulto mayor.