Giliane Wester a bira Reina di Tumba 52

The content originally appeared on: Diario

ORANJESTAD (AAN): Diasabra anochi a tuma lugar na Balashi Beer Garden, e Festival di Tumba 52 di Carnaval 70.

   E actividad a start poco despues di 8:00 pm, y a finalisa casi 2:00 am.

  Ganadora maximo a bira Giliane Wester cu su cancion ‘Baranca’.  El a bira asina Reina di Tumba 52 pa Carnaval 70.  E tabata un composicion di Ronwayne Kock, y aregla pa Denny Loefstop.

   Di dos lugar a bay pa Richard “Tattoo” Quant cu e cancion “Tras di e baricada”, componi pa Richard Quant y Gibi Doran, y aregla pa Xemio Jacobs.

   Di tres lugar a bay pa Jerwin Hernandez cu e cancion “Dr. Tumba”, componi pa Ronwayne Kock y aregla pa Denny Loefstop.

   E ganador di e categoria Tumba Loco a bay pa Tyson Croes cu e cancion “Pat’i Camel”.  Esaki a wordo componi y aregla pa Janiro Eisden y Rygel Isabella.

  E premio di mihor costume a bay pa Jerwin Hernandez.  Premio di Rookie of the Year a bay pa Sendy Loefstop.  E artista mas popular a bira Giliane Wester.  Mihor banda uniforme ta Bomboshi Band.  Mihor composicion a bay pa ‘Baranca’ di Ronwayne Kock.  Mihor areglo a bay pa ‘Baranca’ aregla pa Denny Loefstop.

   Reina di Tumba a gana 10.000 Florin na premio total.  Di dos lugar a gana 2.500 Florin.  Di tres lugar a gana 2.000 Florin.

   Ganador di Tumba Loco a ricibi 3.000 Florin na premio total.  Compositor a ricibi 500 Florin y Areglista a haya 500 Florin.

   E banda cu a sali prome a haya 5.000 Florin na premio total.  Di dos lugar a haya 2.700 Florin.  Di tres lugar a haya 2.100 Florin.

   Compositor di prome lugar a ricibi 2.500 Florin na premio total.  Di dos lugar a haya 750 Florin.  Di tres lugar a haya 500 Florin.  Areglistanan ganador a ricibi premio igual su esaki di Compositor.

   E cantantenan a haci nan best, y sigur a yuda haci Tumba uno di calidad y sigur agradable pa tur hende.  Pabien na SMAC cu e exitoso evento aki.