Gerard Pourier di 85 aña a fayece den lama dilanti Bushiri Beach

The content originally appeared on: Diario

ORANJESTAD (AAN): Diaranson mainta pa 11:45 am, Central di polis a worde notifica via di Centro di Alarma,

cu e momento ey tin un curpa sin bida  ta drief den lama, net cerca di e cura di Aruba Ports Authority na altura di ex-Bushiri Resort Aruba. 
   Centro di Alarma a indica cu nan a manda Ambulans tambe caba eynan pa check e situacion.

   E ora Central di Polis tambe a manda diferente unidad di Polis di Playa pa e lugar pa mira.  Ora cu polisnan a yega na e beach cerca di lama, nan a bin topa cu famia di e persona masculino.

   Ambulance tambe tabata na e lugar, pero lamentablemente no por a haci nada mas pa e persona. 
   A notifica Polis Maritimo, y nan a yega cu nan Boto.  Asina nan a logra saca e curpa sin bida for di lama y trece na pier na ex-Bushiri Resort Aruba.
   Pa 12:45 pm, Dr. Texier a yega y constata morto di Candido G. Pourier, naci dia 4 di October 1936 na Aruba.  Pues e ta un ciudadano di 85 aña di edad.

   Polisnan a solicita pa personal di Bureau Slachtofferhulp tambe yega na e lugar pa duna e famia asistencia den e momento dificil aki. 
   DIARIO y Cuerpo Policial ta manda palabra di condolencia na famia di e fayecido.