Gasolin ta baha awe cu 2 cent pero ta mesun prijs cu Diesel

The content originally appeared on: Diario

ORANJETSAD (AAN): Awe Diaranson 11 di Mei 2022, prijs di combustible ta cambia na Aruba.

   Segun Minister di Asuntonan Economico, Comunicacion y Desaroyo Sostenibel, Gasolin Unleaded Premium ta baha cu 2,0 cent, pa wordo bendi awor na 289,0 cent pa liter.

   Asombrosamente, Diesel ta subi cu 14,5 cent pa wordo bendi awor na 289,0 cent pa liter.

   Kerosin ta subi cu 21,8 cent, pa wordo bendi awor na 275,6 cent pa liter.

   E hecho cu prijs di Diesel awor a bira mes caro cu Gasolin, a sorprende varios observador.  Pasobra for di scol secundario caba alumnonan ta siña cu Diesel ta un producto hopi simple pa refina for di petroleo crudo.  Pesey e ta barata!  Diesel ta mas pisa y menos volatil cu gasolin.

   Resultado di esey ta cu Diesel semper ta mas barata cu gasolin.  Excepto algun pais, caminda Gobierno ta pone extra hopi impuesto y accijns riba Diesel (e.o. na Merca), caminda Diesel historicamente ta mas caro cu gasolin.

   Na Aruba tambe semper tabata asina cu Diesel ta mas barata cu gasolin, y esey tabata loke ta atrae hopi hende pa cumpra un auto sedan cu tin motor Diesel.  Pero e prijs di e siman aki ta un berdadero sorpresa.  Net Diesel cu ta extramadamente ‘cheap’ pa produci na Refineria, awor ta mes caro cu Gasolin.  Gasolin semper ta un proceso hopi mas complica, cu ta rekeri equipo costoso (manera Fluid Catalytic Cracking) pa logra haya e combustible popular aki.