Gasolin pa prome biaha ta subi riba di 3 Florin pa liter

The content originally appeared on: Diario

Aumento drastico di gasolin entrante awe

ORANJESTAD (AAN): Un golpi duro ta loke chauffeurnan di Aruba ta bay ricibi awe Diaranson 8 di Juni 2022.  E cambio den prijs di productonan petrolero 8 di juni 2022, ta kibrando un record.

   Minister Geoffrey Wever di Asuntonan Economico, Comunicacion y Desaroyo Sostenibel a anuncia e prijsnan nobo di benta di combustibel entrante 8 di juni 2022:

   Gasoline unleaded-premium ta subi cu 32,2 cent, pa wordo bendi awor na e prijs record di 321,2 cent pa liter.  Prome biaha cu e prijs ta yega asina halto.

   Diesel LS ta subi cu apenas 1,3 cent, pa wordo bendi awor na 290,3 cent pa litre.

   Kerosin ta subi cu 2,0 cent, pa asina wordo bendi na 277,6 cent pa liter.

   Reaccion cu a drenta mesora ta cu nunca a kere cu Aruba lo a yega na e prijs aki pa gasolin riba e isla.  E ta un indicacion fuerte cu e peligro tey cu pronto lo bo haya tur compania ta cuminza cobra “brandstofclausule” pa haci entrega di tur cos.

   Prijs di transport di agencianan importador lo bay subi, y esaki lo pusha aun mas prijs di hopi producto cu e consumidor Arubiano ta cumpra.  E ta parce cu Aruba no a djis drenta e epoca di Horcan, pero di otro banda tin di prepara pa e “Horcan Economico” cu ta na caminda.

   Prijs extremo na Jamaica: Si tira un bista den region, por nota cu na Jamaica tambe e prijs di combustible a subi na nivelnan cu tin comunidad di e isla, y tambe e piscadornan hopi disgusta.

   E situacion a bira asina drastico na Jamaica, cu Parlamento di e isla a hasta discuti riba un acercamento diplomatico cu nan ta haciendo cu President Nicolas Maduro di Venezuela, pa check si nan por haya un deal nobo pa petroleo.  E isla sa cu e asunto aki ta uno cu nan tin di triangula tambe cu Washington, como cu sancionnan pa cu petroleo Venezolano ainda ta valido.

   Sinembargo Jamaica ta mira, cu e chens cu nan lo por haya un contesta positivo tanto di Caracas como di Washington, lo por toch ta un mihor prospecto pa rescata Jamaica di e crisis di combustible y energia en general.

   Tabatin e deseo tambe pa Jamaica cuminza importa gas y petroleo for di Nigeria, y esey a ser treci dilanti door di Ministro di Energia.

   Rep. Dominicana ta sigui subsidia: Mientras tanto na Republica Dominicana, ya pa varios luna caba e automobilistanan ta gozando di un prijs atractivo pa gasolin.  Esey ta debi cu Gobierno den e prome cinco lunanan a absorba como 17.000 miyon Pesos Dominicano (como 554 miyon Florin) na e prijs di gasolin.  Tur esaki cu e meta pa evita inflacion y otro efectonan colateral cu ta bin ora cu prijsnan di gasolin y diesel subi.

   Ministro di Industria y Comercio, Ito Bisonó a bisa cu Gobierno lo bay mantene subsidio riba gasolin, tanten cu e por.

   Prijs na otro islanan regional: Si tira un bista riba prijs di gasolin na algun pais den region, por mira cu na Barbados, e prijs pa liter di gasolin ta 438,0 cent di Barbados Dollar (igual cu 390,9 cent Arubiano).

   E prijs pa 1 liter di gasolin na e isla di Grand Cayman ta 1.19 Dollar di Cayman Islands, cu ta igual na 2.57 Florin Arubano.

   Na Puerto Rico, e prijs promedio pa 1 liter di gasolin ta US$ 1,36 cu ta similar cu 245,8 cent Arubiano pa liter.