Gasolin awe ta baha cu casi 5 cent pa liter na Aruba

The content originally appeared on: Diario

Prijs di gasolin a cay cu 18% desde September

ORANJESTAD (AAN): Un liter di gasolin entrante awe ta costa 232,9 cen pa liter na Aruba.  Esaki ta un caida di como 18% compara cu e tarifa na luna di September 2023.

   Prijs di combustible a bin ta bahando ultimo temponan na Aruba, y awor a yega na e punto mas abao di ultimo lunanan.  E prijs di Diesel a baha aun mas hopi.

   Minister di Asuntonan Economico, Comunicacion y Desaroyo Sostenibel ta esun cu a anuncia e prijsnan nobo di benta di combustibel awe Diaranson 10 januari 2024:

  Gasoline unleaded-premium ta baha cu 4,8 cen, pa wordo bendi awor na 232,9 cen pa liter.

   Diesel Low Sulphur ta baha cu 13,6 cen, pa wordo bendi awor na 213,6 cen pa liter.

   Kerosin ta baha cu 18,0 cen, pa wordo bendi awor na 198,5 cen pa liter. E prijsnan ta inclui BBO/BAZV/BAVP.

   Caida di prijs di combustible a wordo sinti na mayoria pais y islanan den Caribe, como tambe na Merca y Europa.

   Prijs di petroleo ta cayendo, awor cu un produccion record di crudo na Merca mes, ta saca completamente di balans e economia cu ta debilitando na China.  Varios miembro di OPEC y nan aliado manera Rusia, a priminti di lo bay corta produccion di crudo na 2.2 miyon bari pa dia den e prome cuartal di 2024 den un esfuerso pa purba pusha prijs di crudo un tiki.

   Pero esnan den comercio di petroleo ta sceptico cu OPEC lo bay corta produccion, awor cu ta mirando cu tin hopi suministro di petroleo riba tur mercado.

   Tarifa lo por keda baha: Segun analistanan e siman aki na Merca, nan ta spera cu tarifa di gasolin lo sigui cay pa resto di 2024.  Ya caba cierto parti di Merca ta bende gasolin na e prijs di mas abao desde 2021.

   Merca su inventario di crudo aworaki ta inmenso, y esaki ta hungando un rol primordial den e caida di e costonan.  Sinembargo toch tin potencial riesgonan cu ta keda cu por impacta y stroba prijsnan di sigui baha.

   Esaki ta encera politica rond mundo, of tambe eventonan di mal tempo, sea tormenta di invierno of horcan, cu lo por impacta produccion y distribucion di combustibel.