Gabinete Wever-Croes a pone e piedranan riba e fundeshi di Integridad

The content originally appeared on: Diario

ORANJESTAD (AAN) – Minister Presidente, Evelyn Wever-Croes a remarca cu su Gobierno a pone hopi enfasis riba e tema di integridad,

y tambe a amplia tocante e situacion den e Departamento di Infrastructura y Planificacion “DIP”.

“Ora di mira atras, apesar di e pandemia, e crisis social cu nos pais a confronta, apesar di e crisis di Venezuela cu ta rekeri atencion tur dia, no obstante e crisis financiero cu Aruba a topa cune, Gobierno a logra di pone piedranan den e fundeshi pa Aruba tin un miho grado di integridad den gobernacion.

Nos tin e Bureau Integriteit Aruba, nos a cuminza cu e ‘National Integrity Scan’ (NIS) cu ohala por wordo finaliza pronto, y esaki ta wordo haci riba e principionan di ‘Transparency International’. E no ta un cos cu gobierno ta haci sino otronan y universidadnan renombra di Hulanda”, Prome Minister a señala.

Ademas, gobierno ta trahando riba e “Corporate Government Code”, e “Wever-Croes Norm”, y tambe a institui un Comision cu yama “Commissie Besteking Democratisch Bestel”, pa fortifica Aruba su sistema democratico, y cu tin como tarea pa bin cu cambionan den ley, pa fortifica institutonan manera Raad van Advies, cu ta na Parlamento caba, Algemene Reken Kamer cu mester bin Parlamento pronto; Parlamento mes, cu mester wordo fortifica y independiza y e Ombudsman cu mester wordo regla ainda den un reglamento estatal, den nos Constitucion, e mandatario a indica.

Prome Minister a agrega cu e Ley di Ombudsman ya caba tey, y falta so pa wordo ancra den e Constitucion. Tambe e Ley di Financiamento di Partidonan Politico a bira un realidad y e Ley di Screening ta den Tratamento ainda, den Parlamento.

“Manera mi a bisa, esaki ta e piedranan pa integridad di nos pais. Pa hopi aña a papia so di integridad y bon gobernacion. Desde tempo di e ‘Rapport Calidad’ cu mi traha, recien mi a drenta den gobierno como ambtenaar, mi ta corda cu e tempo ey, e gobierno di señor Henny Eman tabata papia di e Rapport Calidad. Pero el a keda na palabra, pasobra cada bez cu bo kier aplike, bo ta haya resistencia. Aworaki, cu Gabinete Wever-Croes, pa prome biaha e paso aki a wordo tuma, cu nos a mira den e historia di nos pais, avancenan grandi. Y ohala cu nos haya oportunidad pa nos continua pa sigui fortifica e fundeshi di integridad den gobernacion”, Minister Presidente a expresa.

Prome Minister a señala cu no ta pasobra e ta haya esaki bunita, sino pasobra pueblo di Aruba kier y merece esey!

“Nos no merece di pasa mas den berguenzanan di investigacion nos mester percura pa pone un fin na esey” e mandatario a agrega.

Minister Presidente a retoma e tema di Caso Avestruz, liga na otorgamento di tereno for di e Departamento di Infrastructura y Planificacion, cu por lesa den otro articulo.