“G-297 na vanguardia di enseñanza” ta organizando Conferencia “Enseñanza, nos responsabilidad”

The content originally appeared on: Diario

ORANJESTAD (AAN) –E grupo 927 a convoca un conferencia di prensa Diaranzon di e siman aki, conduci pa señor Chando Pietersz.

E conferencia di prensa aki, Peters a splica, a wordo yama pa Grupo 297 na vanguardia di enseñanza, Instituto Pedagogico di Aruba (IPA) y Sindicato di Maestro di Aruba (SIMAR).

E organizadornan di esaki conhuntamente tambe ta organizador di e Conferencia “Enseñanza, nos responsabilidad”.

Chando Pietersz a señala cu G-297, desde inicio a enfoca riba tereno di enseñanza den nos comunidad y como tal a tuma e iniciativa di organiza e Conferencia, y na caminda a haya sosten di tanto IPA como di SIMAR.

“Pa e organizadornan ta comun cu enseñanza, como Instituto, ta di suma importancia pa desaroyo di un pais, tanto na nivel comunitario como na nivel individual.  Cu e conferencia e organizadornan kier aporta na optimaliza funcionamento y rendimento di nos enseñanza, den tur aspecto y tur nivel. Loke tambe ta uni e organizadornan den e meta nos dilanti, ta e hecho cu nos comunidad, pa loke ta trata enseñanza, a yega na un cruzada cu si nos mes no tuma e rienda, otronan lo defini e futuro di enseñanza, na nos Isla. Como tal, nos ta kere cu nos mester haci un esfuerzo grandi pa por tuma e rienda den nos mesun man”, Peters a subraya.

El a sigui bisa cu e organizadornan di e Conferencia, ta di opinion cu na Aruba nos tin suficiente profesional capacita cu por fiha un maneho di enseñanza pa nos Isla. “Es mas, tambe nos ta di opinion cu nos tin e personal capacita pa por guia un innovacion di enseñanza na nos Isla. Nos ta, sinembargo, conciente cu e no ta algo cu un instituto, of un grupo den comunidad por haci. E ta un ehercicio cu ta wordo haci conhuntamente”, Peters a señala, agregando cu nan ta pone hopi enfasis cu den nos comunidad, na e momentonan aki nos tur mester por contribui pa nos yega na un  sistema di enseñanza, cu ta acapara tur e rekisitonan pa un siglo nobo: e Siglo XXI, nos dilanti”, Chando Pietersz a remarca.

“Enseñanza, nos responsabilidad” por wordo analiza di diferente manera. “Nos kier pone, en todo caso, dos punto central. Esta, nos ta bisa ‘nos responsabilidad propio. Es decir, nos ta pensa cu nos mes mester carga e responsabilidad pa cu nos enseñanza; e enseñanza di nos yiunan y enseñanza di nos nietonan. Y di otro banda, ta asina cu nos ta pone den e titulo ‘nos responsabilidad cu e ta toca nos tur’. Y nos ta mire como algo cu mester wordo haci conhuntamente”, señor Chando Pietersz a declara. Den nos siguiente edicion, DIARIO lo sigui elabora tocante e conferencia di prensa interesante aki.