Futuro di Citgo atrobe den sala di Corte di Merca

The content originally appeared on: Diario

Mientras nomber di Citgo ainda ta mara na mercado di gasolin di Aruba — *Interes Ruso den Citgo ta haya un nificacion nobo den conflicto mundial — *Sancionnan Mericano contra Venezuela y Rusia ta topa na momento crucial

ORANJESTAD (AAN)- Cu e relacion Aruba y Citgo a pusha Aruba den awanan sumamente turbulento, ta bini dilanti den e desaroyonan mundial genera pa e crisis di Ukraine cu a crea un confrontacion mundial.

Paisnan di OPEC a subi nan prijs te mas cu $117 Dollar pa bari, loke lo nifica cu Aruba mester prepara cu prijsnan lo sigui subi a base di e situacion actual.

Tal, manera DIARIO a pronostica for di un principio, e confrontacion mundial lo no tabata solamente un asunto di militarismo pero tambe lo a bira un guera cu lo a mishi directamente cu economia mundial y cu lo a hiba e relacionnan comercial internacional na un dimension nobo.

Un asunto cu DIARIO ta sigui continuamente di acerca, ta e desaroyonan entorno Citgo, cu lamentablemente ta keda importante pa Aruba aunke Aruba a logra deshaci di Citgo prome cu e aventura lo a haci Aruba tambe un participe importante di e situacion mundial actual.

E problema mas importante pa DIARIO ora Aruba a firma un acuerdo cu Citgo tabata, e instabilidad politico mundial cu tabata mishi cu Citgo y cu awe ta rementa.

Ayera Corte na Merca mester a bolbe atende cu e posibilidad cu companianan cu Gobierno Venezolano debe placa, ta confisca Citgo of parti di Citgo pa haya nan placa.

E loke mester cualifica como un desastre total a bini dilanti atrobe ora Huez a dicidi cu e companianan cu mester ricibi placa di Venezuela, por confisca y bende parti di Citgo pa nan haya nan placa a pesar di e hecho cu Gobierno Mericano a introduci un medida cu ta proteha Citgo contra e posibilidad di benta.

Un situacion sumamente compleho a keda presenta pa motibo cu Nicolas Maduro a comberti Citgo como borg pa prestamonan cu Rusia y e Grupo 2020 di inversionistanan cu tin 51 porciento di Citgo den nan poder.

Na mes momento, manera DIARIO semper a splica, tin un fila di compania cu mester ricibi placa di Venezuela pa otro prestamonan cu Venezuela a haci pero tambe como pago di nan companianan cu Hugo Chavez y Nicolas Maduro a nacionalisa.

Den sosten na Juan Guaido, Presidente Donald Trump a evita cu por bende e propiedadnan di Citgo.

Na e momento cu e companianan cu Venezuela debe placa a insisti, Rusia a manda un carta pa Huez na Merca, den cual Rusia a mustra cu pa medio di Rosneft cu ta e compania estatal di Rusia pa asuntonan petrolero, Rusia tin derecho riba 49.9 porciento di e accionnan di Citgo.

E medidanan cu Merca a impone riba Nicolas Maduro ora mundo a lanta para contra Nicolas Maduro na 2018, a haci cu pa evita problema pa Rosneft, e interesnan financiero di Rosneft na Venezuela a cay directamente pa Rusia.

Awor sancionnan nobo a wordo tuma contra Rusia den e conflicto di Ukraine. Medidanan directo contra e dirigente mas importante di Rosneft, Igor Sechin a wordo tuma ora a confisca su yate.

Sancionnan contra Rusia y Venezuela dor di mundo liber ta topa na momento crucial, cu tanto Venezuela como Rusia no por duna otro e sosten financiero mas pero Venezuela por yuda Rusia cu petroleo cu cual Venezuela no por haci negoshi cu otro pais, segun medidanan contra Nicolas Maduro.

Kico ta e futuro di Citgo, e compania cu a haya poder riba e producto principal pa transportacion na Aruba ora Gobierno Mike Eman a firma un acuerdo cu Citgo?

E contesta ta sconde tras di e desenlace di e crisis mundial na Rusia, cu na 2016 a wordo ignora, pero pa cual DIARIO a adverti y cu a causa investigacion di e Acuerdo di Citgo dor di DIARIO na 2018.

Awe un compania Britanico poderoso mester admiti cu e ta perde 25 Biyon (pues 25 Miljard) pasobra e mester kibra su lazonan riba tereno petrolero cu Rusia, cu a menasa cu e por cuminsa caso contra tur compania cu no ta cumpli cu nan contracto.

Fin di siman ta habri cu un prijs di petroleo cu ta subi manera raket na un cielo completamente nubla, cu ta stroba mundo mira futuro.