FUTURA hunto cu CMMA, y FCVR ta organisa un workshop pa mucha muhe di edad 12-15

The content originally appeared on: Diario

En conexion cu campaña Mundial di conscientisacion “16 Days of Activism’

ORANJESTAD (AAN):  Gobierno di Aruba ta uni su mes na e campaña Mundial di conscientisacion “16 Days of Activism’ y na tur esfuerso di tur fundacion den nos comunidad pa trece informacionnan tocante violencia contra hende muhe y mucha muhe. E 16 Dianan di Activismo Contra Violencia di Genero ta un campaña internacional cu a cuminsa riba 25 di November, Dia Internacional pa Eliminacion di Violencia Contra Hende Muhe, y ta dura te 10 di December, Dia di Derechonan Humano.

            En conexion cu e campaña di conscientisacion aki, FUTURA hunto cu CMMA, y FCVR ta organisa un workshop pa mucha muhe di edad 12-15, riba e topico “Online Safety”. E workshop lo wordo duna den 4 diferente districto for di 6:00 pa 8:00 PM. E lo cuminsa dia 29 di November na MFA Noord, 30 di November na MFA Paradera. 6 di December na MFA Santa Cruz y dia 7 di December na MFA Savaneta.  

            Na e ocacion, señora Jeanette Richardson-Baars, Coordinador Nacional Contra Traficicion y Contrabanda di Hende Muhe Aruba (CMMA), lo elabora riba e topico ‘No cay den trampa’. Señora Lucienne Lacle di Opta Innova, lo elabora riba e topico ‘Deep Fakes & Online Identity’.

            Prome Minister Evelyn Wever-Croes ta invita mayornan pa registra pa segura un luga ainda pa nan yiunan por participa.

            Por haci esaki na e pagina di Facebook di FUTURA via un link disponibel. (http://bit.ly/3SV6pP3).

            “Ban uni na e campaña mundial di conscientisacion contra violencia y discriminacion di hende y mucha muhe. Haci uzo di e oportunidad aki. Ban conscientisa, educa y empodera nos mucha muhenan. Hunto nos por haci e mundo online mas safe pa nan”, Prome Minister a expresa.

 galleryFUTURA hunto cu CMMA, y FCVR ta organisa un workshop pa mucha muhe di edad 12-15/gallery