Fuente di asistencia financiero di Aruba den problema

The content originally appeared on: Diario

Mundo ta directamente envolvi den un guera internacional –— *Economia y planificacion financiero di Hulanda y Europa afecta — *Crisis Ukraine a deshaci di stabilidad mundial den corto tempo

ORANJESTAD(AAN)—Kico lo ta e resultadonan economico y financiero di e crisis di Ukraine pa Aruba?

Esaki ta parti di e buskeda continuo di informacion di parti di DIARIO, debi na e realidad cu e situacion economico y financiero ta dicidi pa tur desaroyo na e pais.

Pa Aruba e situacion ta mas serio ta cu Aruba tabata den recuperacion di e crisis financiero y e forma cu Omicron a afecta economia di e pais.

Asistencia financiero Hulandes a yuda Aruba evita un colapso sumamente serio cu efecto pisa pa e situacion social di e pais.

Hulanda tambe a wordo confronta cu situacion financiero dificil dor di e pandemia. Sinembargo e hecho cu Hulanda ta mantene su mes na normanan pa su presupuesto, e por a carga e resultadonan di e pandemia.

E crisis di Ukraine ta hinca Hulanda y Union Europeo den un situacion completamente nobo.

Informantenan clave a indica na DIARIO cu diferente factor ta hunga un papel importante na Hulanda.

Costo di bida Hulandes a subi manera un fli den biento na un forma mas severo cu na Aruba. Esaki debi na e clima na Hulanda cu ta exigi mas gasto pa energia sigur den e temporada friu cu e pais conoce actualmente.

Prijsnan a subi drasticamente pa motibo di e prijs di petroleo, cu na fin di 2021 tabata menasa di pasa 100 Dollar pa baril pero awor a bira pio.

Pero tin otro factornan cu mester tene na consideracion.

Hulanda ta participante activo den e actividadnan di Union Europeo y e sosten cu ta duna Ukraine na tur nivel.

E hecho cu Hulanda mester a activa su defensa den union cu Europa y e asistencia cu a duna Ukraine riba tur tereno, ta costa placa.

Hulanda mester habri porta tambe pa ciudadanonan di Ukraine cu ta huy di nan pais y esaki tambe ta trece costonan pa Hulanda.

Manera informantenan a splica, Aruba mester tene na consideracion cu costo di bida ta subi, mescos cu costo cu e pais tin tambe riba tereno di seguridad manera tur pais den tempo di guera.

No por papia oficialmente di un guera mundial, pero si di un situacion internacional cu no conoce paz pero guera.

“Na e momentonan aki mundo no conoce paz. Mundo no conoce stabilidad riba ningun tereno,” a wordo trece dilanti.

Tin diferente scenario cu a wordo crea pa e loke mundo por spera riba tereno financiero y economico.

Pa Aruba ta keda importante pa tene na bista cu sigur su asistencia financiero mas importante, cu ta Hulanda, ta den un situacion financiero sumamente serio y ya a conoce caida economico y financiero importante.