Fregata Frances mara den Waf di Aruba

The content originally appeared on: Diario

ORANJESTAD (AAN): Diaranson mainta Aruba a ricibi bishita di e crusero di Royal Caribbean International, esta ‘Allure of the Seas’ cu miles di turista abordo.

   Mayoria di e pasaheronan a probecha pa cera conoci cu e isla, sea cu Taxi, cu compania di Tour, cu V-auto pa haya sa mas di e isla.  Of a djis bay core riba Tram y pasa den centro di ciudad.

   Por a nota presencia di un fregata Frances tambe den Waf.  Esey ta debi cu henter e siman aki, tin un ehercicio internacional amfibico na Aruba. E training internacional ta na costa di e isla, y ta wordo yama “Très Kolos’.  E ta un training cu ta socede un biaha cada dos aña, y e biaha aki e ta den area y na costa di Aruba.

   Durante e periodo aki Militarnan Hulandes, Mericano y Frances lo participa na e ehercisio.  Militarnan di Aruba tambe lo ta parti di e ehercisio aki.

   Très Kolos (tres color) desde 2010 ta conoci bao di e nomber aki. E tres colornan ta referí na e colornan di e bandera di e paisnan historico cu ta participa.

E ehercisio ta consistí di un parti di competencia di actividadnan Militar y un parti cu ehercisionan tactico. E parti competitivo ta consistí di caracteristicanan tal manera un marcha rapido, un careda di awa cu obstaculonan, un cruzada amfibico, tiramento, y asignacionnan di nabegacion.