For di October 2023 a bin ta boga pa tur trekker y vehiculo pasa proceso di keuring pa por ta den parada

The content originally appeared on: Diario

Richella Dorothal, directora di DTI:

ORANJESTAD (AAN):   Richella Dorothal, Directora di Dienst Technische Inspecties (DTI) a duna di conoce cu  diasabra ultimo, durante e apertura di Carnaval 70 cu e Parada di Flambeu, personal di DTI tabata presente pa duna sosten na e persona di Cuerpo Policial den loke ta control di e vehiculonan cu ta bay den parada.

            Dorothal a splica cu keur e vehiculonan ta algo cu DTI a bin ta boga p’e for di October caba. Nan a cuminsa indicia cu e trekkers, e vehiculonan di motor mester haci e keuring y pa haci esaki DTI tabata habri na final di december y tambe na inicio di januari.

            Durante un reunion diahuebs ultimo a indica cu diabierna ainda por a haci e keuring indicando na balie cu ta pa vehiculonan cu ta bay participa den e parada di flambeu, pa nan por a haya prioridad pa haci e keuring, Richella Dorothal a remarca.

            El a sigui splica cu e hecho cu hopi trekker y vehiculo no tabata tin e documentonan na ordo ta algo lamentabel ya cu a afecta pa e parada por a sigui segun plan. Esaki ta parti di e control y e reglanan cu tin tambe.

            Ta trata di reglanan cu no ta nobo y ta existi pa hopi aña caba. Pero esaki a tuma lugar aworaki y e parti di e plan di seguridad cu ta trahando conhuntamente cu e otro departamentonan y stakeholdernan bao di e capa di CMO (Crisis Management Office) cu tin cu haci cu esaki mester bay na vigor y ta conta tambe pa e eventonan publico cu tin, Dorothal a declara.