Fondonan disponibel pa renovacion di curriculum na Colegio EPI no ta inclui ‘overuren’ di docentenan

The content originally appeared on: Diario

Director di Colegio EPI: —  *E docentenan ta e expertonan den e proyecto di innovacion

ORANJESTAD (AAN):  Ryan Maduro, Director di Colegio EPI a duna di conoce den conferencia di prensa kico nan ta haciendo pa loke ta innovacion den enseñanza.

El a bisa cu esaki ta practicamente un proyecto cu yama NSP1, cu ta mara na e National Strategic Plan.

A remarca cu renovacion di curriculum ta rekeri di recurso. Ta un proceso compleho, un sistema cu tin cu cambia pa por introduci un curriculum adapta of un curriculum nobo.

Cu esaki den mente, na 2020, hunto cu Direccion di Enseñansa a sinta na mesa y a bisa cu tin cu haci innovacion pasobra tur e flechanan ta indica cu EPI tin cu renova su curriculum, Maduro a declara.

El a agrega cu a bay busca fondo via di e National Strategic Plan via Directie Economische Zaken caminda a aloca 1.2 miyon florin. E suma aki a garantisa cu por a contrata un agencia di Hulanda pa guia e proceso bao supervision di  Directie Onderwijs tambe pa atende cu henter e proceso di renovacion  di curriculum den e scolnan.

Loke no ta inclui den dje ta e parti di e oranan cu mester pa e docentenan por haci renovacion di curriculum. Expertonan den renovacion di curriculum mester ta e docentenan, a enfatisa.

Pa por haci esey tin cu kita ora for di e docentenan cu ta duna les pa e haya oranan di tarea pa e por bay traha riba e renobacion. Ta 40 ora pa siman y mester bay parti esaki sin cu e tin su efectonan, a agrega.

Pa e aña aki, por ehempel, ta un aña cu ta papiando di ‘overuren’. E pregunta cu ta bin bek ta: tin fondo pa paga ‘overuren’?, a expresa.

Ryan Maduro a sigui bisa cu e proyecto ta inclui 12 opleiding na nivel 2, 3 y 4. EPB tin 4 opleiding cu nan ta implementando na nivel 2 y EPI tin 8 opleiding na nivel 3 cu 4 y ta inclui e linea di formacion continuo.

No solamente EPB ta haci su opleiding y EPI ta haci su opleiding, pero tambe como nan ta alinea na otro, a indica.

 Un studiante por navega den e sistema di EPI-EPB-EPI y yega na un diploma den un proceso mas eficas, cu aworaki e no tey.

E proyecto tambe ta inclui implementacion di e asina yama Model ‘HKS’ (Herziening Kwalificatiestructuur) den beroepsonderwijs.

Den esaki e docentenan ta trahando hunto pa cada opleiding y diseño di cada programa, a señala.

Locual mester bay haci e siguiente school-jaar pa por sigui innova e opleidingnan cu EPI ta bezig cu ne y esunnan cu ta bieu ainda Maduro a splica lo siguiente.

El a bisa cu nan a haya un tarea cual ta consisti di tres cos: mester a implementa 8 opleiding nobo cu nan ta bezig cu ne aworaki y sigui desaroy’e. Tambe mester renoba 9 di e opleiding bieu cu ta den e school-jaar bieu. Pa esaki mester percura cu tin suficiente ora di e docentenan pa por dedica na e proyecto di innovacion aki.

Riba mesa di dialogo a bin kico ta e opcionnan cu EPI tin y tin tres opcion:


E presupuesto di personal cu tin aworaki cu ta di Land Aruba, hisa esaki pa compensa e extra oranan-docente cu mester.
Keda ‘budget neutral’, locual kiermen cu mester bin cu otro alternativa creativo ya cu no tin fondo. Esaki ta significa cu no tin extra compensacion pa ‘overuren’.
Para innovacion. Si para innovacion, esaki lo ta e di tres biaha cu EPI ta bolbe para innovacion y pa EPI esaki no ta un opcion mas, a remarca.