Flex-Team di Polis ta efectua control cu resultado bisto

admin

Flex-Team di Polis ta efectua control cu resultado bisto1
Flex-Team di Polis ta efectua control cu resultado bisto2

ORANJESTAD (AAN): Durante e siman di dia 5 pa 11 di december, Flex-Team di Polis a sigui controla den tur e “skinanan cayente.” Efectuando e control nan aki riba base diario ta dunando su frutonan, pasobra awor e malhechornan y tur esunnan cu ta pensa cu nan por haci algo malo sa caba cu Polis ta riba nan lomba. Haciendo esaki Flex-Team di Cuerpo Policial ta garantisa siguridad den comunidad.

   Durante nan chekeonan den e diferente “skinanan cayente,” manera, Manuelitos, Cirkle-K, Hotel Bacarat, casnan di pueblo na Noord, Madiki, Seroe Patrishi como tambe De Olde Molen, Cas Casuela y +297.

   E luganan di diberticion tur ta worde controla pa nan ora di cera y tur hende ta worde manda cas pa asina evita lo peor. En conexion cu e ultimo susedidonan unda a uza arma riba caya, Flex-Team ta keda controla na Canoastraat y Corvetstraat na haltura di Budweiser Bar. Aki e control ta riba e hobennan cu semper ta agrupa mirando cu esaki ta un “skina cayente” pa trafico di droga

   Otro luganan cu ta keda bao di control ta e casnan di pueblo na Bushiri, Madiki Kavel, Seroe Patrishi, Sabana Basora na Noord y Noord como tambe Duartestraat y Heidenstraat. Esaki ta pasa pa motibo di e ultimo peleanan unda arma a worde uza. E control ta mas pisa na Duartestraat y Heidenstraat. Dos luga cu constantemente ta riba ruta di control di Flex-Team ta na Eagle Beah y The Village mirando cu sin faya ta haya agrupacionnan di hobennan cu ta sinta scucha musica cu volumen hopi halto y ta consumi alcohol. Mayoria bes nan tin cu worde pidi pa baha e musica ya cu esaki no ta worde tolera despues di 11’or di anochi. Fuera di esey nan ta manda nan tur bay cas pa evita problemanan na final. Asina ta trece e pas pa tur esnan bibando eybanda.

   Siguiendo cu nan trabaonan interminabel, Flex-Team a detene B.V.C. riba 9 di december pa joyriding. Su aventura a cuminsa ora cu el a dicidi di tuma un pickup cu no ta di dje for di e parkeo di Seaport Market Place, a subi L.G. Smith Blvd rumbo San Nicolas pasando memey di tur auto riba caminda. Mirando cu e team tabata riba un caminda secundario sin conexion cu caminda grandi nan a pasa door di Yucuri bay Sabanda Grandi pasa den Franse Pas pa bin topa cu e pickup net na e rotonde di Pos Chikito. Mesora a dun’e señal pa para banda di Xin Hui Supermarket cual e joyrider a haci tambe. Flex-Team a detene y hib’e warda di polis na Santa Cruz pa sigui procesa.

   Riba diasabra dia 10 di december, Flex-Team a haya nan cu un caso di menaza durante un pelea entre sospechoso F.A.G. y e security guard na “E Motions.” E pelea a worde plama, pero Gomez a dicidi di drenta su auto, un Nissan Skyline color blauw rumbo pa busca un arma y bin back pa caba di regla cuenta. Flex-Team trahando cu rapidez a logra par’e na haltura di “El Boco Restaurant” unda cu nan a dicidi di hib’e mesora pa warda na Shaba. Aki e sospechoso a sigui haci fastioso y no a keda nada otro na detene pa e worde procesa.

   Fuera di detencion di un persona pa joyriding y un otro pa menaza cu arma e controlnan a sigui cu spotcheks aki aya unda cu e team a para diferente auto y haya cantidadnan chikito di marihuana, poco cocaina, sker, cuchiu y aparato pa mula marihuana. Durante e siman a haci 113 control unda 6 auto a worde para y dos persona a worde deteni.  Aki por mira cu e accionnan constante di polis ta fructifero y nan ta bisa cu esaki lo sigui te ora cu un y tur compronde cu mester sigui reglanan di sociedad.

Next Post

Polis investigando caso straño di asalto of secuestro na Savaneta

ORANJESTAD  (AAN): Diaranzon den oranan di marduga a sosode un caso na Savaneta, cu a rekeri presencia rapido di Polis.    E prome informe tabata mustra cu ta trata di un caso di atraco brutal usando arma y despues a papia di un secuestro, etc.    Tin agresion tambe cu […]