Fiscal a reclama Hues pa forma con ta interoga testigo

admin

Promer biaha cu ta experiencia esey den Corte

Fiscal a reclama Hues pa forma con ta interoga testigoORANJESTAD (AAN) Den sala di Corte di Husticia, esun cu ta dirigi un caso ta Hues.

   Hues ta dicidi si e caso ta sigui. Hues por hala atencion di tanto Fiscal como abogado. Esaki a yega di sosode diferente biaha. Especialmente den casonan caminda tin investigacionnan grandi a tuma lugar.

   Hopi biaha durante e tratamento di casonan penal grandi, sa sosode discussion basta pisa entre Fiscal y abogado y finalmente ta Hues ta para tur cos.

   FISCAL TA RECLAMA HUES:

   Recientemente durante tratamento di un caso penal, Hues a scucha testigo cu abogado di un sospechoso a pidi pa scucha. Na dado momento, mientras cu Hues tabata hacienda e testigo pregunta, Fiscal a protesta e forma con Hues tabata haci preguntanan.

   Na opinion di Fiscal, Hues tabata pone palabra den boca di e sospechoso. Hues a bira mira Fiscal cu un cara manera, ki falta di respet esaki ta. Hues a mustra Fiscal cu e ta haciendo preguntanan di loke a sosode. Fiscal, aparentemente sintiendo cu loke e testigo tabata declara ta pone e investigacion tambalea, a reclama Hues.

   Hues a momento ey a bisa Fiscal cu e ta instrui Griffier pa anota e protesta di Fiscal den e procesverbaal di e caso. Despues di esey, Hues a sigui cu su interogacion di e testigo.

    Ta promer biaha cu DIARIO ta experiencia algo asina y posiblemente, tras di cortina lo por spera cu Corte di Husticia lo hala atencion di e Fiscal aki debidamente pa e forma con el a actua.

   Normalmente ta asina cu Hues mester duna permiso na Fiscal y abogado pa hiba palabra. Tambe ta Hues mester dicidi si ta pospone e caso of no. Esey ta mustra claramente cu ta Hues ta e autoridad maximo den sala di Corte y tabata hopi straño con Fiscal a reclama Hues di e forma aki.

   Mester bisa cu cada Hues tin su forma con e ta trata e caso. Tin Huesnan ta masha severo durante tratamento di caso y tin otro cu ta mas suave. Hustamente e Hues aki ta conoci pa ta uno hopi severo y critico. Pesey DIARIO a keda straño cu Hues no a hala Fiscal su atencion e momento ey.

Next Post

Fayo for di man di NV Elmar a causa interupcion di coriente

Ta pidi disculpa pa e inconveniencia causa ORANJESTAD (AAN): “Nos ta lamenta e situacion cu a presenta ayera nochi, cu den su mayoria no tabata den nos man of cu nos por a controla”, asina Wanda Broeksema di N.V. Elmar a duna di conoce. E ta referi na e fayo […]