Fiscal a exigi 5 aña di prison pa Chaman Peruano acusa di a viola dos dama y mishi cu un otro

The content originally appeared on: Diario

ORANJESTAD (AAN): Diabierna mainta e homber Peruano C.J.I. (42) a scucha Fiscal exigi 5 aña di prison p’e. Fiscal ta haya C.J.I. culpable di a viola dos dama,

mientras cu e tabata haciendo ritual cu nan y a mishi cu un otro dama na su parti intimo.

ACUSACIONNAN

Fiscal a bisa cu e promer acusacion ta, cu mas cu un biaha en todo caso un biaha riba 22 November 2021, C.J.I. a viola e dama S. contra su voluntad y cu violencia. Tambe Fiscal a acusa di a mishi cu partinan intimo di S., mientras cu e persona tabata den un relacion di dependencia cu C.J.I. siendo un Chaman.

   Tambe Fiscal a acusa C.J.I. di a viola un di dos dama, E. Esey a sosode den e periodo di 13 November 2019 pa 26 November 2019, mientras cu e persona aki tabata den un relacion di dependencia cu e sospechoso como un Chaman.

   C.J.I. tambe ta wordo acusa di a mishi cu e parti intimo di un di tres dama, C. Esey a sosode riba 18 November 2021, mientras cu e Chaman, sanador, terapista di chakra, tabatin e persona aki den un relacion di dependencia. A mishi cu partinan intimo.

Den sala di Corte tabata presente dos di e victimanan.

CHAMAN TA HACI TRATAMENTO

   Hues a puntra C.J.I. si el a forza e dama S. di tene relacion sexual. C.J.I. a desmenti esey. Hues a bisa cu el a lesa declaracion di C.J.I. y e victima. C.J.I. a duna un splicacion cu el a bin Aruba pa comparti e sabiduria di cultura di Peru y tambe tene workshop. El a bisa cu e ta haci ceremonia, ofrenda na mundo. Tambe e ta mustra con pa conecta cu bo mes y ritual cu universo. Hues a puntra si e ta atende hendenan cu problema emocional. Segun C.J.I. e ta asisti cu e tratamento.

El a splica cu el a hereda tur e practica aki di su grandinan cu a traspasa tur e sabiduria aki. El a bisa cu e no ta un medico. Hues a puntra si e ta un Chaman. El a bisa cu Chaman no ta existi den cultura Peru. Pero door cu nan ta haci ofrendanan y ritualnan ta considera esaki como Chaman. E ta bin pa basta tempo caba Aruba pero door di Covid a stop. E ta wordo acerca pa hende pa e bin Aruba.

Den caso di S., C.J.I. a bisa cu S. tabata kier sesion pa curacion. Esey ta un sesion priva. El a splica cu na 2019 caba el a duna sesion na S. Segun C.J.I., S. a asisti na un workshop y tabata sa con e sesion ta.

ADMITI DI A TENE RELACION SEXUAL

   Segun C.J.I. el a haci un session di reprogramacion caminda lo a cura un relacion di mas di 10 aña cu S. tin cu su ex pareha. Hues a puntra kico e session ta encera. El a splica cu e ta usa 7 piedra cu ta special pa chupa energia. Hues a bisa cu segun S., na su cas e mester a kita su paña y mester a tapa su wowo pa no mira. Segun C.J.I. el a bisa S. pa no habri wowo durante e ceremonia y S. a dicidi di tapa su wowo. Segun S., C.J.I. a mishi cu su curpa intimo y tene relacion sexual. Segun C.J.I. ta despues di e ceremonia e tabatin relacion sexual ora cu S. a cuminsa mishi cu su mannan y a bis’e cu e kier tin relacion. Segun C.J.I. e tabata voluntario. El a bisa Hues cu ningun momento el a forza of cu S. a nenga. Hues a puntra pakico anto S. a haci denuncia di abuso contra C.J.I. Segun C.J.I. ta otro hendenan a influenci’e pa haci denuncia.

   Hues a bisa cu e mesun cos a sosode cu e dama E. Segun C.J.I., E. a invit’e pa bay su cas pa mira si por haci limpieza y tambe pa mira e tereno si por haci ceremonia. Na dado momento a haci tratamento y ta E. tambe kier a tene relacion sexual.

   Tambe Hues a mustra cu C.J.I. a haci actonan inmoral cu e dama C. Esaki a sosode na e centro caminda C.J.I. ta haci session y e lo a pone piedranan riba chakra di C.

Ta asina cu tur tres a victima a haci demanda di daño cu ta inclui pago di workshop cu nan a sigui.

FISCAL

Fiscal ta haya legalmente proba cu C.J.I. a abusa di e damanan. Fiscal a repasa tur e pruebanan cu Hues a menciona. El a cuestiona e forma con C.J.I. tabata haci practicanan pa asina abusa di e damanan. Fiscal a exigi 5 aña di prison, kitando e tempo cu C.J.I. ta encarcela den KIA.

Hues, despues di a scucha abogado mr. Illes, a sera tratamento di e caso y a bisa cu e ta bay studia e caso y dia 3 Juni 2022 lo tin sentencia.