Fiesta Rotaria lo tin premio grandi di un Chevrolet Groove

The content originally appeared on: Diario

Evento lo ta Diadomingo awor


Hopi atraccion nobo introduci pa 2024 

ORANJESTAD (AAN): Durante un conferencia di prensa convoca na YMCA Dakota, Rotary Club of Aruba a suministra informacion di nan fenomenal ‘Fiesta Rotaria” cu lo tuma lugar Diadomingo awor, dia 14 di April 2024 dilanti Stadion Guillermo P. Trinidad.  E lo ta for di 9:00 am te cu 6:00 pm.

   Luis Oduber kende ta actual president di Rotary Club of Aruba, a splica cu ultimo dianan aki nan ta haciendo hopi trabao preparando pa e evento grandi aki cu ta atrae semper multitud di hende.

   Oduber a elabora un tiki riba e historia di Fiesta Rotaria, cu na 1960 a start como un ‘actividad chikito’ na aña 1960, esta na Sociedad Bolivariana unda e bishitante por a scucha musica y tabatin cuminda y pasaboca.  Esnan cu a yega eynan mester a paga un suma chikito pa entrada.

   Pero atravez di añanan, e actividad aki a crece y na aña 1981, e organisacion di Rotary Club Aruba a dicidi di reinventa e wiel y el a bira un vlooienmarkt den e formato cu tur hende conoce awendia.  E evento di 1981 a produci ganashi neto di 2.194,41 Florin. El a cuminsa na Wilhelmina Park y despues a bay pa e parkinglot randi dilanti Talk of the Town, y finalmente a muda pa Stadion Guillermo Prospero Trinidad, unda e tey te ainda.

   Oduber a enfatisa cu Fiesta Rotaria ta un evento cultural y social, unda cu por bay atende diferente actividad. E ta tambe e evento principal di e club social aki, via cual nan recauda mas entrada y di e forma ey bira bek y 100% yuda esnan mas vulnerabel den comunidad.   Segun Oduber a indica, cu pa e aña aki, Rotary Club of Aruba ta spera di por genera 300 mil Florin neto.

   Oduber a bisa cu nan no por haci e Fiesta Rotaria aki posible sin e trabao duro di e miembronan, y nan famia tambe.  Sin lubida e patrocinadornan cu ta yuda nan semper.

   E miembro Bert Kamsteeg, kende ta president di Comision Fiesta Rotaria, na su turno a indica cu e setup ta tuma hopi siman adelanta pa prepara, y el a splica cu e ta bay bira un evento bunita.  Lo bay tin ‘Supermarket’ bon gestock, nan ‘Hardware’ cu hopi material di construccion, lo tin ‘Homeware’ cu hopi articulo util di cas, incluyendo computers.  Lo bay tin e seccion di ‘Hardin’ cu lo bende un surtido grandi di mata.

   Tambe lo bay tin un Bar cu ta bon gestock, encarga door di Rotary mes for di awa te cu cerbes.  Lo tin un area yen di actividad nobo pa muchanan bay hunga, y ta haci esaki pues un evento pa famia.  Bay cu bo yiu of nietonan y laga nan disfruta di Dino Jump y hopi cos mas, incluyendo bendemento di juguete.  Lo tin coleccion bunita di paña y material pa cama.

   Kamsteeg a splica cu lo tin un ‘Wheel of Fortune’ unda bo por gana premionan special, manera popchi bunita, bicicleta, y lo tin tres grupo di Pop-Up Restaurant pa goza.

   Lo bay tin henter dia musica en bibo, y e miembro di Comision Fiesta Rotaria, Stanley Looman a indica cu nan lo bay tin entretenimento bon varia, cuminsando di mainta cu ehercicio duna pa Club Kibrahacha, hunto cu musica suministra pa Megateca Genie.  Despues ta sigui cu Club di Movimento cu ta bin cu algo diferente pa publico.  Posteriormente lo sigui cu show di Pierewietje, cu lo ta di 11:30 am te cu 1:00 pm.

   Stephany Quant lo bay canta entretene publico, y pa 3:00 pm lo tin animacion di Rincon Boyzzz cu lo toca te 4:00 pm.  Di 4:00 pm te cu 5:30 lo sigui toca.

   Rebecca Maduro kende ta tesorera di Fiesta Rotaria, a indica cu nan atraccion principal ta e Rifa cu nan ta organisando.  A cuminsa bende ticket algun dia pasa caba.  Lo tin total di 14 premio, di cual premio principal lo ta un compact SUV modelo Chevrolet Groove.

   Lo tin premio di dos pasashi di KLM pa Amsterdam.  Tambe tin premio di Apple iPhone 15 unlocked, certificado di 1.500 Florin di Kooyman, tambe 1.500 di Boolchand’s, 1.000 Florin di Ling & Sons, 1.000 Florin di AMC Unicon, etc.  E ticket aki lo ta 25 Florin.