FEPA kier cuminza cu lesnan den bario unda pueblo lo haya enseñanza mas accesible

The content originally appeared on: Diario

ORANJESTAD (AAN): Dialuna mainta e reunion di Formador hunto cu futuro partner di coalicion, a sigui cu e Stakeholders pa asina haya sa kico ta nan deseo pa e proximo Gobierno tuma cuenta cune.


   Randolf Vrolijk y Jerehm Campbell di Fundacion FEPA, esta ‘Fundacion Enseñanza pa Aruba’, tambe a bishita Formador.

   Na final di e reunion, Randolf Vrolijk a splica cu e tabata un dia grandi y importante cu nan a haya chens di papia riba Enseñanza pa Adulto.

   Na Aruba en general, hopi biaha e ‘Enseñanza pa Adulto’ ta un parti di enseñanza lubida.  Pero awor cu e isla ta pasa den crisis economico y tambe den pandemia, ta bin mira con necesario e ta pa yuda Aruba recupera su economia manera e tabata, of hasta mihor.

   Asina FEPA a trece dilanti na Formado, kico ta e paso cu nan ta kere cu Gobierno tin di bay haci, e sosten cu nan tin di haya, pa asina hunto cu Gobierno nan por engrandece Enseñanza pa Adulto.

   Vrolijk a subraya cu na Aruba, un gran parti di pueblo no tin un estudio secundario termina, y esey ta haci’e hopi dificil pa por funciona como un pais.  A eyga momento cu Gobierno tin di bay mira Ensenanza den su totalidad via un maneho integral como un prioridad inmediato.

   Esey nifica cu ti di bay inverti grandemente den enseñanza pa adulto.  Asina bo ta crea un base solido pa futuro, unda pueblo ta haya oportunidad.  FEPA no a djis acerca Gobierno pa sosten financiero, pero ta kere mas tambe den e sosten moral, unda FEPA ta haya chens cu nan ta haciendo ultimo añanan, unda Gobierno ta duna mas espacio y permisonan pa asina organiza diferente tipo di estudio na Aruba.

   Tin algun estudio cu Gobierno a reconoce y ta algo di aplaudi pero e no ta suficiente.  Fundacion FEPA a lanta luna pasa un Volksuniversiteit cu ta carga nomber di George van Putten.  Tambe FEPA lo bay cuminza cu e prome MAVO na Papiamento.

   Vrolijk a mustra cu nan kier cuminza cu MBO 1, MBO 2, MBO 3, y tambe MBO 4 y tambe HBO na Aruba, y sigui.  Nan kier traha hunto pa engrandece estudionan di ofishi cu Aruba tin mester urgentemente di dje.

   Pero no ta keda cu e spectrum di Aruba so!  Kier traha kizas cu esnan di Curacao y Bonaire tambe, pasobra eynan tin algun curso cu no tin na Aruba.  E ora por organiza hunto cu nan, y trece nan Aruba.

   Ta deliberando cu Hulanda tambe pa bin cu varios curso nobo na Aruba.

   Esey ta loke nan a splica en corto na Formador, y ta spera di por haya cooperacion pa e plannan cu tin poni riba mesa.

   Segun Vrolijk, a mira cu na Aruba hopi hende tin e tendencia di pensa cu ta Gobierno so mester organiza enseñanza.  Pero enseñanza por wordo organiza door di fundacionnan manera FEPA cu ta mira e necesidad pa organiza diferente curso pa Aruba.

   Den e fase nan ta awor, y segun Randolf Vrolijk, FEPA ta creciendo y nan kier mas sosten.  Tambe a pidi Formador pa coopera pa asina FEPA por usa cierto instituto di Gobierno mes, pa cuminza cu lesnan den bario unda pueblo lo haya enseñanza mas accesible pa engrandece nan mes.

   FEPA ta pensa cu un ciudadano no mester depende solamente di 1 estudio of curso, pero e mester haya oportunidad pa escoge for di un serie di curso cu ta wordo ofreci.

   Randolf Vrolijk ta convenci cu tin di bay renoba enseñanza, y esey ta algo urgente!  E mester bira prioridad number uno di e pais.  Den nan caso, FEPA ta bringa pa enseñanza pa adulto, pero nan a bisa cu enseñanza en general mester haya un push nunca antes bisto.

   Si por logra esey, e ora ta riba un bon caminda pa recupera e pais completamente.  Tambe a duna sugerencia riba cambionan interno den Gobierno pa asina por logra e metanan di enseñanza.