FASE ta stop na fin di November aki y awe ta ultimo dia pa aplica pa e delaster pago

The content originally appeared on: Diario

Minister Rocco Tjon ta anuncia:  — *Un total di 10.777 cu a haya FASE


ORANJESTAD (AAN) – Gobierno a convoca un conferencia di prensa Diamars atardi, unda cu Minister di Husticia y Asunto Social, señor Rocco Tjon y Minister di Labor, Energia y Integracion Glenbert Croes a hiba palabra. E temanan tabata cabamento di pago di FASE y e programa Aruba Kier Traha!

            Na prome lugar Minister Rocco Tjon a hiba palabra, y a anuncia cu awe, dia 11 di November ta e ultimo dia cu por inscribi pa FASE, pa nan por cobra e delaster entrada, na final di e luna aki.

            “Mi kier anuncia mesora, cu FASE ta bay stop fin di luna. Obviamente, FASE tabata un parti di e maneho cu a wordo hiba pa brinda un alivio, na momento cu nos a wordo confronta como pais, cu e pandemia. Tin diferente medida cu a wordo tuma, manera loonsubsidie, sosten  financiero na comercio, y FASE tambe tabata un di e programanan aki”, e mandatario a trece dilanti.

            E mandatario a recorda e hecho cu na April 2020 tabata e prome luna cu FASE a wordo implementa. El a bisa cu un total di 10.777 cu a haya FASE, y ultimo ainda na Luna di October 2021, 2.372 persona a haya e yudanza aki.

            “Sinembargo, mirando e conseho tambe cu a bin for di CAft unda nan a urgi pa para FASE di inmediato, nos a yega tambe na e decision aki. No obstante, como gobierno nos a kere si, cu ta importante pa trece un fase di transicion. Y pesey, ya caba for di hopi tempo minister Glenbert Croes ta riba un programa pa tur esnan cu, keto bay, ta sin entrada pa “x” motibo, por wordo acopla den un programa cu por yuda nan subi bek na e mercado laboral.

            Sinembargo, nos no mester lubida cu keto bay Aruba ta depende di Hulanda, pa loke ta e sosten di likidez, muy particularmente e prome y di dos cuartal di otro aña, pa haya e sosten aki, obviamente, e consehonan cu ta wordo duna door di e Colegio di Sosten Financiero, ta hopi importante pa gobierno Hulandes por aproba esaki, Minister Rocco Tjon a remarca.

            Mirando tur e aspectonan aki y tambe cu Corsow y demas paisnan ya caba a stop cu nan yudanza, Aruba tambe a yega na e conclusion aki, pero na un manera responsable, unda tur esnan cu ta depende di FASE por bay den un periodo di transicion, y obviamente, si nan cumpli cu e criterionan por bay den e programa cu Minister Glenbert Croes ta anuncia, esta “Aruba Kier Traha”.

            Finalmente, minister Tjon a declara cu awe, dia 10 di November ta ultimo dia pa aplica pa FASE, pa e personanan cu ta bin na remarca por cobra esaki na final di e luna aki.