Famia di Polonia a tuma Manchebo Beach Resort over

The content originally appeared on: Diario

ORANJESTAD (AAN): Riba Dialuna e proceso legal a keda cla, y di awor en adelante Manchebo Beach Resort & Spa ta bao maneho di un compania nobo, esta Molo Hotel Group.


   Manchebo ta un Hotel cu na 1966 a wordo construi door di pilotonan di KLM, y despues a pertenece pa cinco decada na encargo di legendario Ike Cohen.  Despues di su fayecimento, famia Cohen y representante Bill Crona, a continua na desaroya y sostene e producto di vacacion Manchebo.

   Na 2020 net prome cu e pandemia, famia Slominski a bin pasa vacantie na Aruba. Originalmente for di Polonia, e famia a forma un compania hotelero dinamico den 2017. Nan tabata mirando oportunidadnan na Aruba, pa yuda crea nan portfolio di resortnan di calidad halto den locacionnan bunita rond mundo.
   E hefe di Molo Holding, Lukasz Slominski a bisa cu e tabata canando band’i beach cu mayornan y casualmente a stop na Manchebo pa bebe algo. Tur tres a enamora cu e beach, y e localidad, nan a comparti esaki cu nan famia y hunto dicidi di haci un oferta pa cumpra Manchebo.

   Nan a contact Bill Crona, y mirando cu e resort no tabata pa benta inmediato, den consulto cu rumanan Cohen, Tommy, Ree y Yvonne, e idea pa pasa Manchebo den manan di un compania di famia tabata uno hopi atractivo. Famia Slominski a expresa e deseo pa tuma over e resort, incluyendo tur empleado y gerencia, pa nan sigui haci e bon trabao, manteniendo e concepto original pa e siguiente añanan, te ora bini un eventual expansion.

   Molo Hotels awor ta ubica na Reino Uni, y nan sede principal ta na Suiza, y nan tin 14 hotel sea operando of bao construccion rond mundo.
   Esnan cu semper a maneha Manchebo, a sinti cu famia Slominski ta comparti varios di e cualidadnan di e famia Cohen. Por mira famia Cohen y famia Slominski, pasando e yabi.  Tabata presente tambe Grete ‘Ree’ Case, William ‘Bill’ Crona, Lukas y Kate Slominski, ruman Marcin y casa Justyna Slominski, Eugeniusz y Gabriela Slominski, mayornan di e cuater rumannan Slominski, y Edgar Roelofs (general manager).