Famia cu baby den auto a bolter riba WVB Boulevard rumbo Bushiri

The content originally appeared on: Diario

ORANJESTAD (AAN): Tabata Diadomingo anochi, cu Central di Polis a dirigi un unidad di Polis di Playa rumbo pa Watty Vos Boulevard,

un tiki pabao di e viaducto na Hato rumbo pa Bushiri pa un accident.

   Esaki a socede banda di 6:40 pm na momento cu solo tabata cuminsa baha.  E unidad di Polis a bin topa cu e accident aki como 305 meter pabao di e viaducto riba e via di Ponton pa Bushiri, pues banda panort.  A topa cu un auto compacto Kia Picanto color cora cu number A-71971 gekentel riba e caminda.

   Como cu e prome yamadanan ta indica cu tin dos hende herida, personal di Ambulans tambe a mobilisa pa e lugar.

   Polis a mira cu e impacto tabata contra e vangrail. Un impacto fuerte, mirando con e hero di e vangrail a keda.

  Den auto tabatin un famia, esta un pareha cu nan baby.  E accident violento aki a laga nan tur cu susto grandi.  Chauffeur a perde control y dal contra e rail panort y despues bolter.

   Polis di trafico a presenta y tambe Ambulans cu a atende cu e famia.  Un unidad di Polis a cera e caminda for di rotonde Ponton bay pabao.

   Paramediconan a opta pa bay cu e famia rumbo Servicio di Emergencia na Hospital pa mas observacion. Nan tabata mustra ok e momento eynan, e baby tabata spanta y tabata yora bastante.

   Dialuna mainta pa merdia, e contratista a bay drecha e vangrail bek.