Fabuloso presentacion di Massive Brassband di Aruba den Main Street Parade di Magic Kingdom

The content originally appeared on: Diario

Asambeho a resona na Disney World 

ORANJESTAD (AAN): Un presentacion super, cu a laga tur participante hopi emociona.  E organizacion local di Massive Brassband, ta e siman aki na Florida, pa asina duna un presentacion special hamas bisto na Orlando, Florida na Merca.

   Esey ta cu un Brassband di Aruba, cu e ritmo di Asambeho, a toca den e Parada di Magic Kingdom na Walt Disney World complex.

   E motor tras di esaki, hunto cu e idea di bay toca na Magic Kingdom relaciona cu nan di 50 aniversario di existencia, ta e conocido Reinwald Roderich Lopez, kende tin su propio scol cu yama “Asambeho School Roderich Lopez”.   Roderich tin tambe 3 grupo di brassband, esta ‘Massive Kids’, ‘Massive Youth’, y ‘Massive Brassband International’.

   Esnan cu a duna e show durante e Main Street Parade di Magic Kingdom tabata e 32 integrantenan di Massive Brassband International, y nan a wordo reforza pa 6 tocado di TBS Brassband di Aruba.  Segun Lopez, nan a busca e seis musico aki acerca, pa asina cumpli cu e exigencia di minimo tocado cu Disney ta pidi pa brassband por participa.

   Fuera di esey, nan a bay tambe cu un grupo di bailarina cu nan mes a lanta, bao encargo di Marcie de Jongh, cu asina lo duna publico un tiki bista ta con bo tin di balia e ritmo di Asambeho aki.

   Lopez a viaha pa Florida cu e grupo, danki na yudanza di varios patrocinador, a sa di haya e material necesario pa nan por a haci e viahe pa bay laga e ritmo contagioso di Carnaval resona na Florida.

   Cu Southwest Airlines nan a viaha e siman aki pa Orlando y e presentacion di nan mes den e Mainstreet Parade a socede Diabierna atardi pa 5:00 pm.

   Massive Brassband ta existi pa 22 aña caba na Aruba.