Exitoso curso ta demostra cu Aruba ta sobresali mundialmente den e practica di EFT como ayudo y terapia

The content originally appeared on: Diario

ORANJESTAD (AAN): Recientemente Fundacion Desaroyo Integral (FDI) tabatin e suma placer di otorga na 11 funcionario riba e tereno social y/of educativo un certificado despues di participa na un curso extenso di “Train the Trainers, bou di guia di dr. Robert Leal.

   E funcionarionan aki a ser entrena pa ser entrenado den e metodo di Emotional Freedom Techniques (EFT), popularmente yama tapping. E funcionarionan aki ta apto awo pa duna training na nan coleganan riba tereno social of na school y tambe na otro instancianan social y otro scolnan cu lo ta interesa pa haya conocimento y practica riba e metodo aki. Den e entrenamento cu dr. Robert Leal nan no solamente a profundisa e metodo, pero tambe e parti psycho terapeutico pa atende e diferente aspectonan cu ta bin dilanti den e proceso di ayudo y tambe e didactica como entrenado.

   Dr. Robert Leal a keda sumamente impresiona cu e talento y entusiasmo di e entrenadonan.

Ta aplica e metodo aki di EFT exitosamente aki den caso di problemanan social-emocional manera trauma, agresividad, violencia, actitud neurotico, adiccion, distorsion cognitivo den e diferente areanan di bida diario, etc.

   E metodo aki ta efectivo tambe pa problemanan mental y cognitivo, manera problema den sinamento. Pero tambe den caso di problemanan fisico, dolor y diferente malestar e tapping aki ta hopi efectivo. Y esaki ta conta pa tur edad.

   Ta conoci cu e problemanan ta keda hopi lihe soluciona no solamente den e practica na Aruba, pero tambe internacional.

   Ta resulta y ta di aplaudi cu den henter mundo, Aruba ta e pais cu tin relativamente mastanto profesional entrena riba e metodo aki di EFT, danki na tur e cursonan cu dr. Robert Leal a duna durante hopi ana.

Dialuna atardi den presencia di diferente director di instancia social/ pedagogico y cabesante di scol concerni e certificadonan a ser otorga.

   Ta bay un cordial pabien na tur e entrenadonan y ta desea nan forsa y perseverancia pa sigui aplica e metodo aki cu hopi animo den e trabao importante cu nan ta eherce. Ta trata di Sherrel Werleman di Kukwisa Kleuterschool, Marianne Wouters di Orthopedagogisch centrum, Yasmira Tromp di Maria college, Chela Profet di Imelda Hof, Darlyn Maduro di Instituto Pedagogico Arubano, Sharisa Herrera, Haildy Castano, Yuritza de Cuba, Shaska Cook, Shareena Tromp y Jennifer Margaretha di Departamento di Asuntonan Social.

E programa di Train the Trainers tabata posibel danki na e colaboracion y subsidio ricibi di Cede Aruba.