Evelyn Wever-Croes a dirigi un coalicion imposibel den condicionnan imposibel

The content originally appeared on: Diario

Loke mas a resalta tabata e trankilidad di Evelyn Wever-Croes na tur momento – *E puntonan cu mas a resalta den maneho di Gabinete Wever-Croes I cu ta despedi – *Prome Ministro Wever-Croes a sigui nabega ora cualkier capitan lo a bula na lama


ORANJESTAD (AAN) — Un hende por ta di acuerdo cu un partido of figura politico, of no. Pero den tur honestidad, hende mester admiti cu lo ta na su luga pa skirbi un buki of traha un documentario di e periodo di gobernacion di Aruba cu ta prepara pa cambio di Gobierno.

E sucesonan di e siman aki, ya ta motivacion suficiente pa conclui cu Aruba tabata tin un lider cu no ta entrega spada sin lucha te na ultimo momento.

“Con Evelyn ta sali for di e situacion aki?” ta e pregunta cu hopi hende a lansa despues di eleccion ora un gobierno mester a wordo forma den un situacion cu hopi a sinti nan mes yama pero poco a wordo escogi.

Aruba tabata den un situacion cu por a causa turbulencia grandi na caminda di formacion di un gobierno cu naturalmente hopi politico kier ta aden awor cu e trabou pisa ta tras di lomba.

E momento di salida di e actual Gabinete Evelyn Wever-Croes a yega. Con el a cuminsa?

Y for di e prome momento cu e gobierno mester a wordo forma na 2017, e tabata tin un factor special. Mike Eman, cu a gana eleccion, a dicidi cu e ta hala atras y a entrega e encargo pa forma un Gobierno nobo na Evelyn Wever-Croes, cu a acepta e reto y a forma un coalicion cu mester a considera imposibel na 2017.

Evelyn Wever-Croes mester a traha cu partido POR, cu tabata consisti di personanan cu a bandona diferente otro partido. Pues no tabata trata di un partido cu un historia como partido.

Evelyn Wever-Croes mester a forma Gobierno cu RED, cu un dirigente politico capaz di a ocasiona cualkier problema y cu a nombra como Ministro, un persona cu bon educion pero conoce como un persona sumamente dificil den bida.

Evelyn Wever-Croes a forma e coalicion cu a haya su nomber den un situacion cu hasta lo a haci cu un gobierno na mando, lo a busca caminda pa cas.

Situacion y maneho financiero di Aruba tabata den man di Hulanda, cu for di 2014 a pone un Aruba casi bancarota, bou supervision di Reino, cu a yama e ultimo cifranan di Gobierno di Mike Eman na 2017, un fantasia.

Pero e fantasia mas grandi no tabata e situacion financiero desastroso cu tabata pone Florin di Aruba na peliger. E fantasia mas grandi tabata e situacion economico, cu tabata depende di Nicolas Maduro, dirigente di un Venezuela cu hamber.

Aruba mester a paga mas belasting pa por a sobrebibi.

Coalicion tabata un problema continuo. A bini cambio den POR. Mike Eman a dicidi di bolbe den panorama politico y a cuminsa cu marcha di protesta pa baha Gobierno.

Pandemia Covid-19 a bati na porta. Evelyn Wever-Croes mester a cera porta di economia, porta di turismo.

Evelyn Wever-Croes a sigui cana na cabez di un Pueblo, cu tabata tin un lider. E no tabata grita. E no tabata agita, El a haci loke e mester a haci cu ta cambia suerte di Aruba.

Gobierno Wever-Croes 1 ta yega na final di su careda. Aruba ta den recuperacion. Aruba tin proyectonan nobo su dilanti. Hulanda ta bisa cu Aruba tin futuro y IMF ta aproba.

Na 2017 Evelyn Wever-Croes a tuma timon di un coalicion imposibel pa dirigi Aruba den condicionnan imposibel. El a logra y awor Pueblo ta en espera di un dia nobo pa Aruba.