Esaki ta cuatro fechanan pa bo tin di acudi na Inmigracion pa formulario

The content originally appeared on: Diario

Procedimento pa biaha cu menor di edad

ORANJESTAD (AAN): Oficina di Inmigracion na Emanstraat 39 na Playa lo bay tin horario special riba e siguiente cuatro Diaranson merdia pa publico entrega e formulario di autorizacion pa biahe cu menor di edad.  Esaki ta un informe importante pa tur esnan bayendo vakantie cu nan yiu.  Informa bo famia, bisiña, colega- y amigonan di esaki.  E fechanan ta 10 Juli, 17 Juli, 24 Juli, y 31 di Juli, den oranan parti merdia.

   Procedimento pa viaha: Tabata luna pasa caba cu DIARIO a duna informacion balioso pa esnan cu ta viahando cu mucha menor di edad pa temporada di vakantie.  Un procedimento cu Inmigracion di Aruba ta tene cuenta cune.

   Manera ta conoci, tin diferente rekisito pa biaha cu un menor di edad, pues a delinea esaki mirando cu vakantie di scol ta cuminsa e siman aki

   Cada aña, Inmigracion Aruba, ta confronta diferente caso caminda mayornan pa un of otro motibo no tin e documentonan necesario pa biaha cu un menor di edad, p’esey desde dos aña pasa e formulario di permiso ta obtenibel riba internet.  Por haya e formulario pa download na e website aki:

www.bit.ly/biahemucha

   Segun director di Inmigracion Aruba, e procedura ta necesario, pasobra Aruba tin cu cumpli cu e reglanan internacional contra traficacion di hende (mensenhandel en mensensmokkel). Tambe, mester proteha e menor di edad di, por ehempel, secuestro.

   Cada persona cu ta desea di biaha cu un menor di edad, pa cualkier motibo, sea vakantie, biahe di scol of biahe pa deporte tin cu yena e formulario “Toestemming reizen met minderjarig kind” (Permiso pa biaha cu un menor). Asina por demostra, ora di pasa control na Inmigracion, cu di berdad tin permiso pa biaha cu e menor di edad. 

   Una bes cu download e formulario, mester yena esaki completamente. Hunto cu e formulario, mester entrega e siguiente documentonan: (*) Copia paspoort di esun cu ta duna permiso (mayor/voogd).  (*) Copia paspoort di acompañante.  (*) Copia paspoort di e menor di edad. (*) Si ta aplicabel, copia di permiso valido, (*) Si ta aplicabel, copia di gezag register. (*) Copia di pasashi di regreso.

   Banda di esakinan, ta posibel pa entrega e “geboorte akte” di e menor di edad, sinembargo esaki no ta necesario si cumpli cu e prome rekisitonan menciona. 

   Hiba formulario: Tene cuenta cu tin 4 fecha disponibel pa hiba e formulario y tur otro documento na oficina principal di Inmigracion Aruba pa control y stempel.

   Esaki lo bay ta Diaranson parti merdia pa publico, dianan 10 Juli, 17 Juli, 24 Juli, y 31 Juli.  Esaki ta na e oficina na John G. Emanstraat 39, net pariba di Aruba Experience Café.

   Inmigracion Aruba ta haci un suplica na cada mayor/persona cu ta desea di biaha cu un menor di edad, pa tene cuenta cu e proceso aki por tuma tempo den e temporada druk di vakantie, pues ta sugeri pa hiba e formulario y tur otro documento, minimo 4 dia prome cu biaha. Di e forma aki, lo evita di haya problema y/of perde vuelo.