Epoca di vacacion di politiconan local y e ola di crisisnan mnndial!

The content originally appeared on: Diario

Resultado di olanan di calor na Merca por cambia destinacion di turista

*Juli 2024 cu eleccion na Venezuela y ultimo etapa pa eleccion na Merca

*Gobierno di Reino ta un pagara y Aruba mester di Oposicion di calidad 

ORANJESTAD(AAN)—For di despues di e pandemia di Covid-19, DIARIO na un forma continuo, a prepara Aruba pa un escenario mundial cu cambionan grandi y sumamente interesante.

Mientras Aruba ta prepara pa vacacion grandi, cu lo ta tambe e vacacion di Parlamento di Aruba, e ola di crisis mundial ta alcansa su punto maximo y ta sostene tur e spiertamentonan cu DIARIO a lansa pa Aruba riba tur tereno ta prepara pa loke mundialmente y regionalmente lo bira realidad.

Na e momentonan aki, e situacoion mundial, e situacion den Reino y asuntonan serio manera cambio di clima, ta exigi di Aruba un bon gobernacion constante, pero tambe un Oposicion cu generalmente mester subi su calidad.

Cu algun excepcion sumamente limita di politiconan di Oposicion na Aruba, mester yega na e conclusion cu e nivel di Parlamento di Aruba na un momento importante pa e pais, ta conoce un falta di politiconan di Oposicion, cu no ta limita nan mes na spera e momento cu Gobierno ta comete un eror pa presenta nan wega politico.

Cu Leynan cu ta base pa Parlamento di Aruba den nos man, nos ta midi e produccion di cada Miembro durante uno di e temporadanan mas crucial cu historia moderno di Aruba a produci.

Aruba no solamente ta depende di politiconan local, pero tambe di e mundo politico Hulandes na prome lugar, pa motibo di e base constitucional di Reino.

Na e momento aki Reino Hulandes conoce un situacion sumamente preocupante, den cual e Parlamento Hulandes, tin e aparencia di un show di fuego artificial.

Vacacion di verano a bati na porta di representacion di Pueblo den Reino y na Aruba tambe.

Sinembargo, DIARIO mester lanza un advertencia serio, pa manera ley ta exigi, vacacion politico no deshaci di e interes di politiconan pa loke por afecta bienestar di Aruba den un situacion den Reino, cu poco biaha DIARIO a mira for di e prome momento di su existencia.

E interes politico no solamente di Oposicion Hulandes enfrente e sosten cu Geert Wilders ta haya na Hulanda pero tambe di partidonan manera VVD cu tin actualmente e forsa cu e partido tabata tin bou Mark Rutte, cu actualmente ta parti di Gobierno Hulandes, ta bini salta na bista.

VVD ta pasa sigur den un crisis cu un lider cu no por compara cu Rutte, aunke nos ta sostenedor ferviente di Rutte. E actual dirigente di VVD cu a perde su lugar como partido mas grandi di Hulanda, no tin e forsa politico pa posiciona su mes den e realidad Hulandes y ta bira hasta peligroso pa e bon desaroyo di actual Gobierno Hulandes y Gobierno di Reino.

Aruba mientrastanto no por observa solamente Gobierno di Reino. Juli ta nifica luna di eleccion na Venezuela, caminda temor ta reina pa loke Nicolas Maduro ainda por haci si e mira su futuro politico di un forma of otro na peligro.

Na mes momento na Merca, por tuma nota di situacionnan historico, caminda Presidente Joe Biden ta tene duro na un futuro como Presidente di Merca a pesar di su edad, mientras su opositor Donald Trump ta keda un amenaza pa e partido di Biden.

Un situacion historico pues ta presenta su mes na Merca, mercado mas importante di turismo di Aruba, cu mester tene cuenta cu e atake frontal cu cambio di clima a bira pa un parti grandi di Merca, cu ta sufri enormemente di e olanan di calor cu ta azota e pais y asina ta forma un amenaza pa sigur e sector di turismo na paisnan cu ta destinacion di e turista Americano.

Si hustamente e clima cayente ta un atraccion pa Aruba, na e momentonan aki e cantidad enorme di ciudadanonan Mericano cu no por soporta e calor na nan pais, sigur lo opta pa clima menos calor pa pasa nan vacacion.

Cifranan di cual DIARIO a tuma nota ta mustra cu un cantidad considerabel di ciudadano Mericano ta victima di e cambio di clima, loke tin tur posibilidad pa afecta nan decision pa nan destinacion turistico, manera den pasado DIARIO a adverti.

Tambe mester tene cuenta cu e temporada sumamente activo di horcan cu por atrae turistanan cu kier aventura na prome lugar pero sigur por afecta e seguridad di nan biahe pa motibo di cancelacionnan di vuelonan por ehemplo cu e temporada di horcan por produci pa destinacionnan.

Na e momentonan crucial pa Reino, pa region di Aruba, pa Merca como baluarte economico di Aruba y pa Venezuela na horizonte di Aruba, e calidad di trabou di Parlamento di Aruba mester subi y sigur e forma cu mayoria di Oposicion ta atende cu e trabou serio cu Pueblo a pone den nan man, mester conoce cambio pa asina sirbi interes di Aruba na culminacion di problemanan serio pa e pais, cu no sin mas por entrega su mes na e deleite acostumbra di temporada di vacacion.