Entrega di Post Sierra Brandweer Aruba na San Nicolas

The content originally appeared on: Diario

ORANJESTAD (AAN): Dialuna atardi a tuma lugar entrega di Post Sierra Brandweer Aruba na San Nicolas, despues cu a finaliza trabaonan di renovacion.

Durante un conferencia di prensa minister di Husticia y Asuntonan Social

Rocco Tjon a bisa cu e ta sumamente satisfecho cu entrega di Post Sierra.

“Como Gobierno ta importante pa crea condicionnan adecuado di trabao pa empleadonan y nos por a constata cu brandweer pa hopi tempo no a haya e atencion cu e tabata merece”.

Esaki ta e motibo cu ya caba for di inicio di Gabinete Wever Croes 1 a percura pa duna e departamento su atencion debido, pero realidad ta tambe cu tabata tin diferente contratempo pa loke ta trata e organizacion interno, segun Tjon.

El a sigui bisa cu esaki a causa cu cierto proyecto a tarda.

E mandatario a sigui bisa cu hunto cu sindicato di brandweer, miembronan y management team, a percura pa traha un plan pa por ‘haal in’ e falta di atencion cu tabata tin pa e departamento aki.

“Pesey for di inicio di Gabinete Wever Croes 2 na 2021 a aproba 7 miyon florin adicional pa cuminza remedia e situacion na brandweer”.

Esaki a pone cu aña pasa pore a busca uniform nobo pa tur esnan cu ta traha na brandweer, mientras cu por a busca tambe materialnan nobo cu ta forma parti di e asina yama ‘persoonlijke uitrusting’ di e empleadonan manera helm, zapato y handschoen, segun e minister.

El a sigui bisa cu e placa a wordo uza tambe pa compra di trucknan nobo y renovacion di meldkamer di brandweer, mientras cu a cuminza cu opleidingen cu tabata pega pa hopi tempo.

Tjon a splica cu Post Sierra tabata e prome proyecto infrastructural cu a wordo aproba riba 30 di December 2021.

“E joya di proyecto aki no tabata posibel sin e cooperacion cu e ministerio a haya di Prome Minister”.

Mi kier menciona esaki pasobra ta su ministerio a pone fondonan disponibel pa nos por a completa e proyecto aki, segun e mandatario kende a gradici tambe D.O.W, Albo y sindicato di brandweer cu a pusha hopi pa tur e proyectonan menciona wordo logra.

Tjon a gradici e comision special encarga cu compra di tur e trucknan.

El a gradici tambe e comision encarga cu renovacion di e edificio.