Enseñansa pa Empleo lo yega na un nivel halto cu cooperacion di Montgomery College

The content originally appeared on: Diario

Minister Glenbert Croes:

*certificacion di trahadornan lo cumpli cu necesidadnan di mercado laboral 

ORANJESTAD (AAN): Durante su estadia na Merca, Minister di Labor Glenbert Croes a tuma e oportunidad pa reuni cu Montgomery College.  Esaki ta un paso importante pa Minister Glenbert Croes su vision unda e mandatario su vision pa Enseñansa pa Empleo ta pa yega na un nivel halto y asina prepara nos hendenan pa drenta mercado laboral unda mas nos mester di nan awor.

   Mirando e laso estrecho cu Montgomery College tin cu Ministerio di Enseñansa na Aruba, a tuma e decision di acercanan pa pidi yudansa pa cu mercado laboral. E meta di e reunion ta pa wak si nan ta dispuesto na yuda Enseñansa pa Empleo den un cooperacion pa e certificacion di e trahadornan local, cu lo desea di haci uso di diferente cursonan, pa asina por cumpli cu e necesidadnan di e mercado laboral na Aruba.

   Montgomery College ta un “community college” di aproximadamente 25 mil studiante. Un colegio multicultural cu studiantenan di diferente nacionalidad y cu tin hopi experiencia pa yuda den e transicion di integracion di esnan cu ta indocumenta na Aruba caba. Ta importante pa mediante Enseñansa pa Empleo prepara y capacita e futuro trahadornan aki pa asina nan por contribui efectivamente na e mercado laboral na Aruba.

   Minister Glenbert Croes a expresa di ta sumamente satisfecho cu e resultado di e reunion, na unda Montgomery College ta dispuesto na yuda Enseñansa pa Empleo den e trayectoria aki.