Emergencia ora motor di Boeing 737 di Delta Airlines a sufri Compressor Stall

The content originally appeared on: Diario

Dos zonido fuerte di explosion sinti


Avion a keda bula como 51 minuut prome cu el a regresa
Vuelo pa Atlanta a keda cancela e anochi 

ORANJESTAD (AAN): Diamars atardi na momento cu un Boeing 737-900ER di Delta Air Lines a caba di lanta vuelo na Aruba, exactamente 4:17 pm, diripiente dos explosion fuerte a wordo scucha den area di Buenavista, Wayaca, Simeon Antonio, Kas Paloma, y Mahuma.

   Esaki a socede debi cu e motornan #1 di e jet a sufri loke ta ser yama un ‘Compressor Stall’, caminda sea un componente di e motor a kibra, of ora cu e compressor no ta haya suficiente aire pa e parti di combustion.

   Esaki ta pone cu e motor mesora ta perde forza, y mayoria biaha Compressor Stall ta produci vlamnan largo di candela cu ta aparece sporadicamente patras di e motor.  Y esey ta loke pasaheronan, y tambe varios persona na tera a mira.

   Explosion sinti duro: Prome cu e avion a lanta, ningun hende a mira cu tur cos ta normal cu e avion y su motornan.  E avion di Delta Air Lines cu vuelo 581 rumbo pa Atlanta, a bandona Gate pa 4:06 pm, y despues a taxi pa e comienso di pista, y pa 4:16 pm a haya clearance pa take off, pues asina el a subi 4:17 pm.

   El a caba di subi, bayendo ariba cu un ground-speed di 304 km/h.  Sinembargo asina cu e Compressor Stall aki a socede cu motor #1 (motor banda robez), su velocidad mesora a bay atras ora e ta subiendo na 900 pia di altura.  E avion a sigui subi, pero su velocidad a baha.  Pasando riba Parke Nacional Arikok cu altura di 2.300 pia, e avion su ground-speed a baha te na 284 km/h.  Esey no ta peligroso, pero ta indica con den e prome minuut tabata haci ahustacion pa purba mantene airspeed den cockpit.

   E reduccion di speed ta debi cu e motor cu problema a wordo paga, y e avion a sigui cu djis e otro motor cu e tin, lagando su capacidad na maximo.  Boeing 737 ta un avion di 2 motor.  E Capitan a core notifica Beatrix Toren, cu nan lo bay keda bula na 3.000 pia.  Toren a confirma na e Capitan, cu nan tambe a mira vlam ta sali for di Motor #1.

   Na Aeropuerto tambe, a dicidi pa stop tur vuelo di subi of baha, pasobra mester a core inspecciona henter e pista pa mira si acaso algo lo por a cay for di e motor y keda benta abao riba pista (obhetonan FOD) cu lo por trece otro avionnan den peligro.  Pero esey tabata djis un paro breve.

   Capitan a keda haci checklist pabao di Aruba: E avion di Delta Air Lines mientras tanto a sigui subi te na 3.100 pia, pero tabatin dificultad pa sigui subi, pues Capitan a opta pa keda na 3.000 pia.  E prome minuutnan e tabatin dificultad pa keda na e altura exacto ey, pasobra el a sigui varia, bahando tin biaha te na 2.600 pia, pa despues subi bek y ora di a bira panort di Aruba direccion pabao, e capitan a logra mantene e avion bek na 3.000 pia, y ground-speed a subi te na 413 km/h.  Esaki ta debi cu a haci modificacion na e.o. slats y flaps di e avion pa por bula cu mas velocidad.

   Capitan a indica mesora cu nan kier regresa Aruba, sinembargo no por haci esey mesora como cu nan tin diferente checklist pa haci.  El a indica cu e kier keda den ‘area local’ pa sigui check tur e mensahenan di advertencia cu ta aparece den cockpit.

   Riba e grafico aki por mira tur e ruta cu e avion a keda bula pa como 51 minuut largo den area Noordwest y tambe West di Aruba prome cu el a bin bek.  El a keda bula na altura di 3.000 pia, cu ta un altura cu hopi biaha ta produci hopi turbulencia pa avion.  Pues algun momentonan nada confortabel pa pasaheronan.

   Despues di a keda bula rond, y cu a haci tur e checklist abordo, banda di 4:50 pm nan a indica cu nan ta cla pa ateriza bek na Aruba.  Na Aruba a bati alarma, caminda Crash Trucks a bay posiciona nan mes, y Ambulans a wordo poni na altura.

   Aterizahe sin problema: Pa exactamente 5:08 pm e avion a ateriza sin problema, cu tur Crash Truck di Bombero prepara riba standby.

   E Capitan a bay para te na final di e pista, unda Bomberonan a yega cerca pa revisa e motor.  Nan a mira cu ainda tin huma ta saliendo di e motor.  E momento ey Aeropuerto a cera tambe breve pa atende e emergencia, y debi cu e avion ta riba pista.

   Despues cu a mira cu no tin peligro mas, a duna e avion luz berde pa e regresa e mesun Gate 8 cu el a bandona como 1 ora prome.

   Aki atrobe Aeropuerto mester a bolbe revisa e pista pa check si cualkier obheto (“FOD”) lo por a cay di e avion ora di ateriza.  Despues di esey a habri Aeropuerto bek pa tur otro vuelo.

   E avion no a bula mas pa e anochi, como cu esaki lo ta un reparacion extenso.  Te na ciere di edicion, no ta conoci si acaso Delta a manda un otro avion pa bin recoge e pasaheronan, of si acaso mester a duna tur e no-residentenan un anochi extra den Hotel na Aruba, sperando cu awe Diaranson nan lo por regresa Atlanta.