Embehesimento ta un realidad y nos mester prepara

The content originally appeared on: Diario

Fundacion Movemiento ta Bida

ORANJESTAD (AAN): E di dos edicion di e Congreso Caribense Enbehecimento Activo, mescos cu e di prome, ta trata di tres tema general di Hende, Metodo y Practica. Presentacion di e oradornan experto di Chile y Hulanda lo contribui sin duda na e temanan menciona. Nos ta atene nos mes na y ta promove e principionan proponi por medio di Nacionnan Uni pa e adulto mayor, cu ta inclui: 1. independencia, 2. participacion, 3. cuido, 4. realisacion propio y 5. dignidad (mira anexo).

Dr. Juan Carlos Molina, experto den geriatria, lo dirigi su mes, for di un perspectiva multidimensional, riba e causa number uno di un adulto mayor fragilidad cardiovascular. Riba e di dos dia e lo mustra e beneficionan di actividad fisico riba nivel biomolecular pa embehecimento activo. Pa complementa e presentacion di Dr. Molina, Dr. Sandra Matsudo lo ilustra e importancia y impacto di e skelet muscular den salud y malesa.

Por bisa cu durante e congreso aki ta pone atencion special riba e principionan di “Cuido” y Dignidad” di e principionan proponi por medio di Nacionnan Uni. Dr. Sasha Bolt y Dr. Judith Mijers lo discuti di e importancia di cuido participatorio digno y informa pa e adulto mayor na final di su bida. Lo revisa desaroyonan riba e tereno di cuido paliativo. E cuidadornan profesional ainda tin competencia inadecuado riba e tereno di e cuido paliativo pa cu e cuido pa personanan cu demencia. Pa e motibo aki ta presenta y lo debati e metodologia di e cuido dedica di demencia na final di e bida.

E expertonan aki lo tin interaccion cu e profesionalnan local relevante. Por ehempel, prome y durante e congreso Dra. Sandra Matsudo lo papia cu e miembronan di e asociacion di fisioterapistanan na Aruba. E docternan Bolt y Mijers lo sigui informa y apoya e organisacionan manera casnan di cuido di SABA, Stichting Cas Marie, Fundacion Hospice Atardi y e Ministerio di Adulto Mayor den nan area di experticio. E potencial resultadonan di esaki por ta e colaboracion formal di e Proyecto di ACP ”Dedicatiewerkwijze” hunto cu e partidonan interesa di Corsou y Boneiro den e sentido aki. Ademas, hunto cu e informacion ricibi durante di e congreso, por argumenta pa un metodo specifico pa cuido paliativo na personanan den un fase avansa di demencia of nan sernan keri.

Fundacion Movemiento ta Bida ta contento cu tur nos cuatro oradornan internacional ta ser considera expertonan di primera y oradornan autorisa den nan respectivo areanan. Mester bisa cu cada un di e expertonan aki a duna nan tempo pa realisa e congreso aki.

E obhetivo principal di nos esfuerzo ta pa informa, educa, innova y promove e aplicacion di e miho practicanan relevante basa riba evidencia cu ta fomenta un embehecimento independiente, digno y activo. Aki ta pone enfasis riba data scientifico y a base di evidencia.

Nos expertonan local tambe a compromete nan mes y a duna boluntariamente nan tempo, nan conocemento y experencia pa logra e obhetivonan di e congreso aki. E presentacionnan di e oradornan local ta dirigi pa un miho comprension di e estado di e cambio demografico cu Aruba ta experenciando y lo experencia den un futuro cercano, e impacto potencial y actual di e proceso di embehecimento di e bienestar di e poblacion local di edad avansa y e siguridad di e entrada den nan behes.

Otro temanan cu lo discuti ta e fortalesimento di e apoyo cu tin entre cuidadornan di adulto mayor fragil y descapacita na Aruba, e tipo di opcionnan di cas cu tin pa e adulto mayor y e cuido paliativo na Aruba. Ta importante pa enfatisa cu diferente persona lo duna nan testimonio riba e dos topiconan aki durante e congreso.