Educacion Emocional ta un tema cu a wordo poni central durante Parlatino na Panama

The content originally appeared on: Diario

Parlamentario Ricky Hoek (MEP):

*Ta trahando riba un ley modelo pa introduci esaki den e sistema educacional 

ORANJESTAD (AAN):   Un grupo di Parlamentarionan di Aruba a bay Panama pa atende den Comision di Educacion, Cultura, Ciencia, Tecnologia y Comunicacion, e reunionnan di Parlatino.

            Parlamentario di Fraccion di MEP, Ricky Hoek, a duna di conoce c’un di e topiconan cu a wordo trata ta ‘Educacion Emocional’. Mester remarca cu esaki ta un tema cu e parlamentario a trece dilanti riba 12 di December 2023 durante e tratamento di Presupuesto 2024. E ta haya cu e ta uno masha importante.

            El a indica cu e topico aki ta asina importante pasobra aworaki tur e paisnan di America Latina y Caribe ta trahando riba un ley modelo pa introduci esaki den e sistema educacional. Esaki tin un impacto hopi grandi riba e muchanan, e maestronan y sociedad.

            “Rabia, tristesa, desahogo ta puntonan emocional cu hopi biaha nos comunidadnan no sa trata cu ne of no sa con pa handle cu nan. Y esakinan mester bira puntonan hopi esencial con bo ta trata cu e emocionnan di cada persona. Na ki momento, na ki instancia y con ta bay haci esaki”, Hoek a expresa.

            E tema di ‘Educacion Emocional’ ta riba agenda den e reunionnan di Parlatino caminda ta bisa con ta bay integra esaki den e sistema di educacion. Tambe mester wak ki impacto esaki tin pasobra e parlamentario ta di opinion cu den tur aspecto di bida tin cu bay anda cu emocionnan.

            Entre mas miho ta prepara cu e tema aki por atende cu nan, por yuda y hisa e productividad como tambe e felicidad di cada persona na Aruba.

            “Mi ta kere cu riba e punto aki nos lo sigui elabora riba dje pa wak con e ley modelo aki ta bay keda incorpora den otro y asina tambe nos por trec’e Aruba y traha riba dje mas den detaye”, asina Parlamentario Ricky Hoek a duna di conoce for di Ciudad di Panama.