Edad ta un di cuater factor di dificultad pa haya trahado den mercado laboral

The content originally appeared on: Diario

Hose Figaroa di FTA

ORANJESTAD (AAN) E di cuater factor di influencia cu Presidente di Sindicato FTA, esta Hose Figaroa, a menciona den entrevista cu DIARIO, pa loke ta trata e dificultad pa haya trahador pa  nos mercado laboral, ta edad. Segun Figaroa, hopi dunador di trabao cu tin ofertanan laboral, ta dirigi na personanan cu edad maximo di 45 pa 50 aña.

   E ta haya cu esaki no ta logico, pasobra un trahador cu 50 aña di edad, ainda tin minimo 15 aña mas pa bay prome cu e yega su edad di pensioen “Pues, bo no por pone un limite di edad asina abao. Si e no por tuma hende di 60 pa 62 aña ainda mi por compronde pasobra e ta hopi cerca di su edad di pensioen y ora e persona draai den su trabao ya ta den su tempo pa bay. Pero si bo ta papiando di 50 aña, bo tin un decada y mey pa bay ainda, pa dedica na un trabao.

   Pues no ta logico cu bo ta bay pone e tipo di limitacion aki, sigur no mirando e edad di e poblacion di Aruba cu ta subiendo.  Bo ta exonera un grupo grandi di trahador potencial door di pone e tipo di exigencianan ey”, e Presidente di FTA a señala.