Economia mundial marca pa instabilidad

The content originally appeared on: Diario

Paisnan importante pa economia mundial ta adverti pa recesion — *Aruba como pais importador mester vigila realidad mundial — *Resultadonan politico di catastrofe economico a cuminsa presenta

ORANJESTAD(AAN)- Aruba ta parti di un mundo, cu sin cu por a spera, for di 2020 a conoce un caida total.

Si na 2020 ainda tabata wordo bisa cu na 2021 hende lo a cuminsa bolbe na trankilidad, tabata hustamente 2021 cu atrobe a presenta situacionnan mas serio pa na 2022 Covid-19 a uni na problema di petroleo y awor na un mundo na guera.

Wall Street ta e caya grandi na e parti sur di ciudad di New York, conoci como Lower Manhattan.

Aki mundo financiero ta topa y hende ta cumpra y bende balornan financiero.

Un caida historico a marca e bolsa (lugar di compra y benta) di balornan den e situacion mundial sumamente serio cu for di inicio di e Guera na Ukraine, DIARIO a anuncia.

Cifranan Mericano di gobernacion ta mustra riba e situacion alarmante pa economia y situacion financiero mundial, cu ta deshaci di tur stabilidad.]

Na Inglatera alarma grandi a wordo bati dor di gobernantenan mientras cu Deutsche Bank a admiti cu e ta kere cu na 2023 mundo lo conoce un recesion.

Esaki ta nifica cu un situacion mundial serio ta desaroya, mientras mundo financiero y economico ta basha abou.

Kico su resultadonan lo ta? Kico Aruba por spera?

DIARIO na varios ocasion a mustra, cu mescos cu nos mester prepara Aruba pa situacionnan cu a presenta mientrastanto, Parlamento di Aruba y tur gremio di Aruba mester cuminsa splica Pueblo kico ta pasa.

Nos mester ta sumamente honesto cu loke ta pasa actualmente. No ta trata di kico lo pasa cu trahadornan. No ta trata solamente di cuanto comercio lo bende. Ta trata aki di henter e sistema financiero y economico mundial, cu nos conoce, cu ta den problema serio.

Splica Pueblo concretamente kico ta un Bolsa di Balor. Mustra kico ta pasa na un Bolsa di Balor cu ta centro financiero, caminda negoshi grandi di mundo ta wordo haci.

Kico ta nifica cu Deutsche Banki a emiti un advertencia cu na 2023 economia mundial y situacion financiero lo conoce un recesion, loke ta nifica cu nan ta cay for di trapi?

Esaki ta nifica cu e mundo financiero y economico cu mester produci tambe pa Aruba, ta na peliger serio.

Aruba ta un pais importador. Sin importacion, Aruba sobrevivi.

Economia di Aruba ta basa riba turismo, cu ta e ingreso mas grandi di e pais y ta nifica cu e pais ta importa turismo, cu ta percura pa “divisas” cu ta sostene e Florin.

Tur sector na tur forma mester prepara Aruba pa e realidad mundial, cu no ta limita su mes na e posibilidad cu Vladimir Putin por uza bom nuclear.

Ya Vladimir Putin a basha mundo abou cu su guera, cu ta destrui loke tabata nos costumber, nos nivel di bida y ta menasa tur hende.

Si un Prome Ministro di Inglatera ta bati alarma grandi pa loke por pasa na su pais, si na Merca, e popularidad di Biden a baha den e situacion actual, si paisnan grandi ta grita, kico e problema pa Arubs ta?

DIARIO ta vigila e situacion cu ta marca pa e enemigo mas grandi di un pais y hende cu ta instabilidad, cu ta nifica cu un rato tin caida y e siguiente rato ta sigui cana en espera di otro crisis, otro caida.

Aruba mester prepara su mes pa asina por enfrenta un situacion alarmante cu palabranan grandi y importante ta sconde pasobra (manera ta sumamente normal) tur hende no por comprende e idioma complica di economia mundial, cu actualmente ta un volcan cu a cuminsa emiti huma!