Eagle LNG cu tremendo presentacion pa pueblo na MFA Savaneta

The content originally appeared on: Diario

Marco Berlis (MEP):

ORANJESTAD (AAN): Riba Diamars cu a pasa, e compania Eagle LNG a cuminsa cu su dianan di informacionnan na pueblo den e MFA di Savaneta. Den e presentacionnan aki a duna un cobertura amplio di cada area di desaroyo di e proyecto, cual ta e rapportnan cu mester worde completa, ki materialnan ta bay uza pa e proyecto, con e tuberia lo worde poni, y mucho mas.

   A papia tambe di e aspecto tecnico y e beneficionan cu e proyecto aki lo trece pa nos pais.

  Marco Berlis di Partido MEP, a subraya cu tabata tin basta hende presente na e prome dia di informacion aki, y pa e gran mayoria, esaki tabata consisti di profesionalnan, empresarionan y tecniconan. Masha hopi pregunta a worde haci na e expertonan di Eagle LNG y esakinan tur a worde contesta detayadamente.

  E cantidad di pregunta ta refleha cu esnan presente tabata desea di ricibi informacion corecto y alcaso.  E ambiente di e reunion tabata hopi ameno y positivo y mester bisa cu mirando e expresion riba e cara di esnan presente, tur a keda satisfecho. E grupo di hende a keda basta rato pa sigui combersa cu expertonan di Eagle LNG despues di e presentacion.

   Diaranson atardi tabatin un otro session di informacion di expertonan di Eagle LNG y tambe riba Diahuebs anochi di 6:00 pm -9:00pm.

   Berlis ta invita pueblo en general pa bin y scucha informacion balioso di e proyecto aki y haci bo pregunta sin miedo na e expertonan. E ta sigur despues di scucha y wak e presentacion di Eagle LNG, y scucha e contestanan riba e preguntanan cu lo worde haci, bo tambe lo por conclui cu e proyecto aki ta magnifico pa nos pais!