E situacion di DIP tin e economia di Aruba tranca

The content originally appeared on: Diario

Parlamentario Alvin Molina, fraccion di MEP:

ORANJESTAD (AAN) – Parlamentario Alvin Molina, di fraccion di MEP, den un entrevista cu DIARIO a referi na e servicio di DIP (Departamento di Infrastructura y Planificacion).

Molina a expresa cu DIP pa hopi aña ta den un estado terible pa loke ta toca e servicio cu ta duna pueblo di Aruba. El a bisa cu den varios ocasion el a pidi atencion pa esey, desde cu e ta na Parlamento, ya pa dos aña.

“Hopi caso ta andando e ultimo añanan y mi ta imagina cu esey ta trece hopi incertidumbre cerca e trahadornan; esey ta afecta e trabao cu nan ta haci, tin casonan penal, hopi investigacion disciplinario tambe andando, trahadornan a wordo manda cas husto of inhustamente. Mi ta reitera cu mi ta imagina cu esaki ta trece hopi incertidumbre”, Parlamentario Molina a señala, indicando cu esey no mester tabata asina.

Locual e parlamentario ta haya inhusto ta cu pueblo di Aruba tin cu sufri e consecuencianan cu e servicio ta keda malo y ta keda sconde, na su opinion, tras di e casonan menciona. Hendenan cu kier traha nan hogar pa nan famia ta keda warda añanan; comerciantenan cu kier inverti den e economia di Aruba no ta haya ni un contesta; esey ta stroba economia; ta stroba hendenan crea cuponan di trabao pa famianan por tin pan riba mesa. Mi a bisa den diferente ocasion cu e situacion di DIP, entre otro, sigur tin e economia di Aruba tranca”, Alvin Molina e señala.

El a agrega cu den e ultimo añanan el a skirbi carta, a haci pregunta, a entrega mocion, a reuni den varios ocasion cu Minister di Infrastructura, cu e mando di DIP, y e no a mira ni un mehoracion.

“Atrobe tin scondimento tras di e casonan, y na dado momento mi mester a pidi pa e minister interveni. Mi ta compronde di un banda cu el a depolitisa e Departamento, el a duna un mandato na e director pa tuma decisionnan individual. Pero ora ta toca e funcionamento di e departamento den su base, e minister ta keda politicamente responsable y p’esey mi a pidi’e pa interveni. El a tuma varios opcion y te na ultimo a dicidi pa cambia e director y a pone un director suplente na e momentonan aki, anto e ta trece speranza”, Alvin Molina a relata.